Психологик триллер мухлислари учун: психотерапевтлар ва уларнинг беморлари ҳаёти тасвирланган турк сериаллари

Айтишларича, психикамда муаммо йўқ, деб ўйлайдиганларга шунчаки ташхис қўйилмаган. Бу фикрга қўшилиш ёки қўшилмаслик сизнинг танловингиз. Аммо сўнгги йилларда суратга олинган турк сериалларини томоша қилсангиз, бунга ўзингиз ҳам амин бўласиз.

“Фи, Чи, Пи”

Психологик триллер марказида истеъдодли психиатр Жан Манай туради. У муваффақиятли карьера қуриб, ўз соҳасининг ҳақиқий юлдузига айланган. Муаммо шундаки, унинг ҳам қалбида қоронғи томонлари бор ва бу томонлар унга балерина Дуру ёқиб қолган пайтдан бошлаб тобора аниқ кўрина бошлайди. У севиб қолади, лекин бу туйғу муҳаббатдан кўра кўпроқ қарамликка ўхшайди. Ахир Жан психологик ҳийлаларни яхши билади ва у Дурунинг ва унинг қаллиғининг ҳаётини тун-у кун кузатишни бошлайди.

“Қизил хона”

Турли қаҳрамонлар, синиқ тақдирлар ва уларнинг барчасига битта психиатр. Ҳар бир серияда томошабинлар қабулга келган янги қаҳрамон билан танишадилар. Мутахассис креслосида эса, “Қўрғон сирлари” сериалидаги Нукҳет ролидан таниш бўлган, мафтункор Биннур Кая ўтиради. Фильмда беморлар ҳаёти кўрсатилади, уларнинг муаммоларига чуқур кирилади ва психиатр билан биргаликда оғриқли занжирлардан қутулишга ёрдам берадиган ечим топишга ҳаракат қилинади.

“Мени яшир”

Бир қарашда “Мени яшир” сериали классик севги учбурчаги каби кўриниши мумкин, фильмда ҳеч қандай қизиқ нарса йўқдек туюлади. Аммо ҳаммаси бунчалик оддий эмас. Наз — бой ва эркатой қиз, унинг ёнида эса ҳар доим содиқ хизматкор Инжила бўлган. У ёрдамчисини худди бир буюмдек қабул қилади. Тасаввур қилинг, бу итоаткор қўғирчоқ тўсатдан овозини кўтариб, Назнинг қаллиғи бўлмиш Мете билан бўлишга қарор қилса-чи? Энди барча қаҳрамонларга психотерапевт ёрдами керак, аммо афсуски, уларнинг ҳеч бир бундай қилишни ўйламайди.

“Психотерапевт”

Бу фильмнинг бош қаҳрамони ҳам психотерапевт шифокор бўлади. Четин ўз беморларига қўрқув ва хавотирлардан қутулишга, улардан озод бўлишга ёрдам беради. Бир куни фавқулодда воқеа юз беради: сирли қотиллик содир бўлади ва гумонланувчини топишнинг имкони йўқ, бу эса Четинни терговчи ролига киришга мажбур қилади. Четиннинг ўзига ҳам бу иш қизиқ, чунки жабрланувчи унинг қаттиқ севадиган ва оғир касал рафиқаси Лейла бўлиб чиқади.

Жиноятчи шунчалик “тоза” ишлаганки, ортида на из, на далил қолдирган. Фақат девордаги расм воқеани бир оз ойдинлаштириши ва бош қаҳрамонни унинг ҳаётини барбод қилган кишининг изига туширишга ёрдам бериши мумкин. Шундай қилиб, Четин бир хонада бир вақтнинг ўзида бешта гумонланувчи билан қолади — уларнинг ҳар бирида жиноятни содир этиш учун етарлича сабаб бор эди.

“Бегуноҳлар уйи”

“Бегуноҳлар уйи” — ҳақиқий психик бузилишлар энциклопедияси. Бу квартирада яшаётган ҳар бир қаҳрамоннинг болаликдаги чуқур травмаларидан шаклланган ўзига хос мажбурий ғоялари мавжуд. Бу улар яшашига тўсқинлик қилмоқда, ҳатто уларнинг жисмоний ҳолатига ҳам таъсир ўтказмоқда, аммо муаммони ҳал қилиш учун ҳеч бири қандайдир чора кўришни хоҳламайди. Мажбурий-компулсив бузилиш (ОКБ), ижтимоий фобия, психопатия, тўлиқ назоратга интилиш. Бу сериал ҳам “Қўрғон сирлари” каби туркиялик психиатр Гулсарен Будайжиўғлу китоби асосида суратга олинган.