Psixologik triller muxlislari uchun: psixoterapevtlar va ularning bemorlari hayoti tasvirlangan turk seriallari

Aytishlaricha, psixikamda muammo yo‘q, deb o‘ylaydiganlarga shunchaki tashxis qo‘yilmagan. Bu fikrga qo‘shilish yoki qo‘shilmaslik sizning tanlovingiz. Ammo so‘nggi yillarda suratga olingan turk seriallarini tomosha qilsangiz, bunga o‘zingiz ham amin bo‘lasiz.

“Fi, Chi, Pi”

Psixologik triller markazida iste’dodli psixiatr Jan Manay turadi. U muvaffaqiyatli karyera qurib, o‘z sohasining haqiqiy yulduziga aylangan. Muammo shundaki, uning ham qalbida qorong‘i tomonlari bor va bu tomonlar unga balerina Duru yoqib qolgan paytdan boshlab tobora aniq ko‘rina boshlaydi. U sevib qoladi, lekin bu tuyg‘u muhabbatdan ko‘ra ko‘proq qaramlikka o‘xshaydi. Axir Jan psixologik hiylalarni yaxshi biladi va u Duruning va uning qallig‘ining hayotini tun-u kun kuzatishni boshlaydi.

“Qizil xona”

Turli qahramonlar, siniq taqdirlar va ularning barchasiga bitta psixiatr. Har bir seriyada tomoshabinlar qabulga kelgan yangi qahramon bilan tanishadilar. Mutaxassis kreslosida esa, “Qo‘rg‘on sirlari” serialidagi Nukhet rolidan tanish bo‘lgan, maftunkor Binnur Kaya o‘tiradi. Filmda bemorlar hayoti ko‘rsatiladi, ularning muammolariga chuqur kiriladi va psixiatr bilan birgalikda og‘riqli zanjirlardan qutulishga yordam beradigan yechim topishga harakat qilinadi.

“Meni yashir”

Bir qarashda “Meni yashir” seriali klassik sevgi uchburchagi kabi ko‘rinishi mumkin, filmda hech qanday qiziq narsa yo‘qdek tuyuladi. Ammo hammasi bunchalik oddiy emas. Naz — boy va erkatoy qiz, uning yonida esa har doim sodiq xizmatkor Injila bo‘lgan. U yordamchisini xuddi bir buyumdek qabul qiladi. Tasavvur qiling, bu itoatkor qo‘g‘irchoq to‘satdan ovozini ko‘tarib, Nazning qallig‘i bo‘lmish Mete bilan bo‘lishga qaror qilsa-chi? Endi barcha qahramonlarga psixoterapevt yordami kerak, ammo afsuski, ularning hech bir bunday qilishni o‘ylamaydi.

“Psixoterapevt”

Bu filmning bosh qahramoni ham psixoterapevt shifokor bo‘ladi. Chetin o‘z bemorlariga qo‘rquv va xavotirlardan qutulishga, ulardan ozod bo‘lishga yordam beradi. Bir kuni favqulodda voqea yuz beradi: sirli qotillik sodir bo‘ladi va gumonlanuvchini topishning imkoni yo‘q, bu esa Chetinni tergovchi roliga kirishga majbur qiladi. Chetinning o‘ziga ham bu ish qiziq, chunki jabrlanuvchi uning qattiq sevadigan va og‘ir kasal rafiqasi Leyla bo‘lib chiqadi.

Jinoyatchi shunchalik “toza” ishlaganki, ortida na iz, na dalil qoldirgan. Faqat devordagi rasm voqeani biroz oydinlashtirishi va bosh qahramonni uning hayotini barbod qilgan kishining iziga tushirishga yordam berishi mumkin. Shunday qilib, Chetin bir xonada bir vaqtning o‘zida beshta gumonlanuvchi bilan qoladi — ularning har birida jinoyatni sodir etish uchun yetarlicha sabab bor edi.

“Begunohlar uyi”

“Begunohlar uyi” — haqiqiy psixik buzilishlar ensiklopediyasi. Bu kvartirada yashayotgan har bir qahramonning bolalikdagi chuqur travmalaridan shakllangan o‘ziga xos majburiy g‘oyalari mavjud. Bu ular yashashiga to‘sqinlik qilmoqda, hatto ularning jismoniy holatiga ham ta’sir o‘tkazmoqda, ammo muammoni hal qilish uchun hech biri qandaydir chora ko‘rishni xohlamaydi. Majburiy-kompulsiv buzilish (OKB), ijtimoiy fobiya, psixopatiya, to‘liq nazoratga intilish. Bu serial ham “Qo‘rg‘on sirlari” kabi turkiyalik psixiatr Gulsaren Budayjio‘g‘lu kitobi asosida suratga olingan.