“Дарё”да Қашқадарё вилоятининг Кўкдала туманида туман Солиқ инспекцияси ходимлари солиқчилар кунини нишонлаш учун ҳудуддаги “Мовароуннаҳр” ресторанида қарзга еб-ичгани, бир ҳафта ўтганидан кейин ресторан эгаси Анвар Янгибоев солиқчилардан пулини сўраса, улар ресторанга текширув ташлаб, тадбиркорни 6 суткага қаматгани хабар берилганди. Солиқ қўмитаси мазкур мақолага муносабат билдириб, солиқчиларнинг қарзга еб-ичгани, бу эса давлат хизматчиси одоб-ахлоқ қоидаларига зид иш эканини тан олди.
Дастлабки ўрганишда, Кўкдала тумани солиқ инспекциясининг ходимлари 2024 йил 12 август куни тумандаги “Хондамир фаровонлик файзи” МЧЖга қарашли умумий овқатланиш шохобчасида таомланишган ва тўловни қарз сифатида ёздириб кетиб (давлат хизматчиси одоб-ахлоқ қоидаларига зид), 14 август куни қарз тўланган, — дейди Солиқ қўмитаси масъуллар ҳолатни тан олар экан.
Қўмитанинг аниқлаштиришича, тадбиркорнинг солиқдан ўзи айтганидек, 35 миллион сўм миқдорида эмас, 8 миллион 272 минг сўм миқдорда қарздорлиги бор.
“Хондамир фаровонлик файзи” МЧЖнинг бюджетдан 8 миллион 272 минг 730 сўм солиқ қарзи мавжудлиги сабабли солиқ инспекцияси ходимлари Қ.Нормуродов ва А.Маматовлар 2024 йил 8 августдаги 713148-сон қарор асосида 19 августда мол-мулк хатловига борганида, жамият иш юритувчиси А.Янгибоев томонидан қаршилик кўрсатилган, — дейилади қўмита ахборотида.
Ажабланарлиси, қўмита ходимлари қарзга еб-ичганини, қарзни кейин тўлаганини ва хизмат текшируви қарз тўланганидан сўнг амалга оширилганини ёзяпти. Аммо текширув тадбиркор пулини сўрагани учун қилинганини инкор этмоқда. Туҳматга алданиб қолманг дейишмоқда. Шунда ҳақли савол туғилади: тадбиркор учун 8 августда қарор чиққан бўлса, нега солиқчилар 12 август куни унинг ошхонасига бориб, қарзга зиёфат қилишади? Қўмитада бунга жавоб йўқ.
Қўмитанинг жавоб версиясига кўра, солиқчилар тадбиркор уларнинг хизмат текшируви ўтказишга халал бергани учун ҳолат юзасидан қонуний чора кўриш учун ҳуқуқни ҳимоя қилувчи органларга тегишли ҳужжатларни тақдим этган.
Жиноят ишлари бўйича Кўкдала тумани суди томонидан жамият иш юритувчиси А.Янгибоевга 6 сутка маъмурий қамоқ жазо чораси тайинланган. Ушбу қарордан норози бўлган фуқаро А.Янгибоевнинг аризасига асосан апелляция шикоятидан сўнг жазо чораси 3 суткага камайтирилган. Ҳолат юзасидан хизмат текшируви тайинланди, — дейди қўмитадагилар.
“Дарё” интернет нашри кези келганда Солиқ қўмитаси ахборот хизматига шуни эслатиб ўтадики, таҳририят ҳеч қачон бирор бир ташкилот ёки қўмитанинг жумладан Солиқ қўмитасининг ҳам шаънини булғашни мақсад қилмаган. Нашр ОАВ сифатида барча давлат ташкилотларига кўзгу тутади ва борини борича кўрсатади. Таҳририят миш-мишларга асосланиб, мақола эълон қилмайди. Сайтда эълон қилинган ҳар бир материални асословчи далиллар — фото, видео, аудиоёзувлар бор. Таҳририят ҳар бир журналистнинг материалини асословчи фактлари етарли бўлсагина, жамоатчиликка ошкор этади. Ва ёзилган ҳар бир маълумотни асослашга қодир. “Дарё” барчага жумладан, солиқчиларга ҳам бирдек микрофон тутади ва ўз сўзини айтмоқчи бўлганларга минбар беради.
Изоҳ (0)