“Daryo”da Qashqadaryo viloyatining Ko‘kdala tumanida tuman Soliq inspeksiyasi xodimlari soliqchilar kunini nishonlash uchun hududdagi “Movarounnahr” restoranida qarzga yeb-ichgani, bir hafta o‘tganidan keyin restoran egasi Anvar Yangiboyev soliqchilardan pulini so‘rasa, ular restoranga tekshiruv tashlab, tadbirkorni 6 sutkaga qamatgani xabar berilgandi. Soliq qo‘mitasi mazkur maqolaga munosabat bildirib, soliqchilarning qarzga yeb-ichgani, bu esa davlat xizmatchisi odob-axloq qoidalariga zid ish ekanini tan oldi.
Dastlabki o‘rganishda, Ko‘kdala tumani soliq inspeksiyasining xodimlari 2024-yil 12-avgust kuni tumandagi “Xondamir farovonlik fayzi” MCHJga qarashli umumiy ovqatlanish shoxobchasida taomlanishgan va to‘lovni qarz sifatida yozdirib ketib (davlat xizmatchisi odob-axloq qoidalariga zid), 14-avgust kuni qarz to‘langan, — deydi Soliq qo‘mitasi mas’ullar holatni tan olar ekan.
Qo‘mitaning aniqlashtirishicha, tadbirkorning soliqdan o‘zi aytganidek, 35 million so‘m miqdorida emas, 8 million 272 ming so‘m miqdorda qarzdorligi bor.
“Xondamir farovonlik fayzi” MCHJning byudjetdan 8 million 272 ming 730 so‘m soliq qarzi mavjudligi sababli soliq inspeksiyasi xodimlari Q.Normurodov va A.Mamatovlar 2024-yil 8-avgustdagi 713148-son qaror asosida 19-avgustda mol-mulk xatloviga borganida, jamiyat ish yurituvchisi A.Yangiboyev tomonidan qarshilik ko‘rsatilgan, — deyiladi qo‘mita axborotida.
Ajablanarlisi, qo‘mita xodimlari qarzga yeb-ichganini, qarzni keyin to‘laganini va xizmat tekshiruvi qarz to‘langanidan so‘ng amalga oshirilganini yozyapti. Ammo tekshiruv tadbirkor pulini so‘ragani uchun qilinganini inkor etmoqda. Tuhmatga aldanib qolmang deyishmoqda. Shunda haqli savol tug‘iladi: tadbirkor uchun 8-avgustda qaror chiqqan bo‘lsa, nega soliqchilar 12-avgust kuni uning oshxonasiga borib, qarzga ziyofat qilishadi? Qo‘mitada bunga javob yo‘q.
Qo‘mitaning javob versiyasiga ko‘ra, soliqchilar tadbirkor ularning xizmat tekshiruvi o‘tkazishga xalal bergani uchun holat yuzasidan qonuniy chora ko‘rish uchun huquqni himoya qiluvchi organlarga tegishli hujjatlarni taqdim etgan.
Jinoyat ishlari bo‘yicha Ko‘kdala tumani sudi tomonidan jamiyat ish yurituvchisi A.Yangiboyevga 6 sutka ma’muriy qamoq jazo chorasi tayinlangan. Ushbu qarordan norozi bo‘lgan fuqaro A.Yangiboyevning arizasiga asosan apellyatsiya shikoyatidan so‘ng jazo chorasi 3 sutkaga kamaytirilgan. Holat yuzasidan xizmat tekshiruvi tayinlandi, — deydi qo‘mitadagilar.
“Daryo” internet nashri kezi kelganda Soliq qo‘mitasi axborot xizmatiga shuni eslatib o‘tadiki, tahririyat hech qachon biror bir tashkilot yoki qo‘mitaning jumladan Soliq qo‘mitasining ham sha’nini bulg‘ashni maqsad qilmagan. Nashr OAV sifatida barcha davlat tashkilotlariga ko‘zgu tutadi va borini boricha ko‘rsatadi. Tahririyat mish-mishlarga asoslanib, maqola e’lon qilmaydi. Saytda e’lon qilingan har bir materialni asoslovchi dalillar — foto, video, audioyozuvlar bor. Tahririyat har bir jurnalistning materialini asoslovchi faktlari yetarli bo‘lsagina, jamoatchilikka oshkor etadi. Va yozilgan har bir ma’lumotni asoslashga qodir. “Daryo” barchaga jumladan, soliqchilarga ham birdek mikrofon tutadi va o‘z so‘zini aytmoqchi bo‘lganlarga minbar beradi.
Izoh (0)