Қашқадарё вилоятининг Кўкдала туманида туман Солиқ инспекцияси ходимлари — 12 август солиқчилар кунини нишонлаш учун ҳудуддаги “Моварауннаҳр” ресторанида қарзга еб-ичди. Тонгги соат 03:00 га қадар ресторанни ёпган солиқчилар ҳисоб-китобга келганда, ўзини мастга солиб, бирин-кетин қоча бошлади. Хуллас, ўша кунги еб-ичар қарз бўлди. Бир ҳафта ўтганидан кейин ресторан эгаси Анвар Янгибоев солиқчилардан пулини сўради. Сўради-ю, боши балога қолди. Ресторанини ёпишга киришишди, ўзини 6 суткага тиқдирди. Бу ҳақда “Daryo.uz”га тадбиркорнинг ўзи ҳикоя қилиб берди.
12 август куни солиқчилар куни экан. Ўша куни тумандаги солиқчиларнинг тўрт-беш нафари келиб, кечки пайт банкет қилмоқчи эканини айтишди. Жой қилиб беринг дейишди. Ўзлари билан олиб келинган бир яшик ароқ ва газли ичимликларни ташлаб кетишди ва кечки пайт соат 7 ларда йиғила бошлашди. Ўша куни тонгги 03:00 гача ўтирган солиқчилар жуда тартибсиз ўтиришди, кўп идишлар синдирилди. Ўша куни ҳаммаси маза қилиб ўтиришиб, ҳисоб-китоб қилмай кетишди. Ҳатто раҳмат ҳам айтишмади. Уч кундан кейин ҳудудимизга масъул бўлган Озод исмли инспекторга телефон қилиб, ўша куни яхши ўтдими, камчилик бўлмадими, болалар яхши хизмат қилдими деб сўрадим. Изига ҳисоб-китоб бўлмаганини айтдим. Раҳбарининг аввалдан меҳмонлари бўлганини, қарзи борлигини эслатдим-да, “уни сўрамаяпман, лекин буни ҳисоб қилиб кетмасаларингиз бўлмайди. Мен бутун туманнинг харажатини кўтара олмайман”, дедим. Озод ҳисоб-китоб қиламиз ака, ёпилади деди. Лекин келмади, дейди бу ҳақда “Daryo.uz”га гапириб берган тадбиркор.
Маълум бўлишича, ушбу мулоқотдан сўнг, ресторанга 3 нафар солиқчи келиб, ўша кунги еб-ичар ҳисобини кўришган. Қанча қарздорлик бўлганини билиб қайтишган. Бироқ ҳисоб-китоб қилинмаган.
Эртаси куни яна Озодга телефон қилиб, солиқчилар келишибди. Лекин ҳисобни тўлашмабди дедим. Озод бу ҳақда бошлиққа айтаман деди. Ва эртаси куни соат 2 ларда 2 миллион 900 минг сўм пул олиб келяпти. Ўзи жами ҳисоб-китоб ўзлари ароғи ва газли ичимликларини олиб келишгани боис, 3 миллион 400 минг сўмдан сал ошганди. 2 миллион 900 минг сўмни олиб, бу банкет учунми ёки эски қарзларми дедим. Банкет учун олинг буни, эски қарзларни бошлиқнинг ўзи билан гаплашасиз деди. Хўп деб, пулни олиб қолдим ва ичкарига кирдим. Озод солиқчи кетди. Орадан ярим соат ҳам ўтмади, хонамда ўтиргандим ходимларим солиқчилар келишди деди. Чиқсам, 2 киши турибди. Бу солиқчиларни илгари танимас эканман, фақат банкетда кўрган эканман. Улар рестораннинг 35 миллион сўм атрофида солиқ қарздорлиги борлигини, ёпмоқчилигини айтишди. Мен бунга жавобан бу товуқ катагимас ёки буткамас, устахонамас ёпишдан олдин огоҳлантириш бериш керакмасми дедим. Бу ресторанда айни пайтда ярим тайёр бўлган, пишган, айниб қолиши мумкин бўлган таомлар бор дедим. Шунда ходим бу ҳақда туман Солиқ инспекцияси бошлиғининг 8 август куни имзолаган қарори борлигини айтди. Кўрсат десам, мана телефонда деди. Менга ҳужжатнинг ўзини олиб кел дедим. Қолаверса, ҳужжатингни кўрсатмадинг дея атайлаб қилинаётган иш учун жаҳлим чиқа бошлади. “Агар фаолиятим ноқонуний бўлса, 8 август куни ёпилиши лозим бўлган ресторан бўлсак, нега 12 август куни ўзларинг келиб, еб-ичиб, банкет қилдинглар, ёпмадинглар” дедим, дейди тадбиркор.
Суҳбатдош тадбиркорнинг айтишича, юзага келган 35 миллион сўмлик қарздорлик мулк солиғи бўлиб, бу миқдор ҳар кварталда ошиб борган.
Бу сумма ичида чек бермагансиз дея жарима ҳам қўйишган экан. Лекин бу ҳақда бизга ҳеч ким айтмаганди, хабар бермаганди. Ўша куни дабдурстдан шунақа деб қолишди ва 35 миллион сўм ичида 8 миллион сўмлик жарима ҳам бор деб, шуни айтишди. Мен буларнинг барчаси ўша кунги банкет пулини сўраганим учун бўляптими дедим. Ва қонуний тартибда келишлари кераклигини айтиб, улардан ресторандан чиқиб кетишни талаб қилдим. Ўзим ҳам чиқаришга уриндим. Шунда солиқ ходимининг устидаги кўйлаги тугмаси узилган экан, дейди Анвар Янгибоев.
Воқеа давомида тадбиркор 1000 қисқа рақамига қўнғироқ қилиб, солиқчиларнинг хатти-ҳаракатидан норозилигини айтиб, шикоят қилган. Кўчада эса туман Солиқ инспекцияси бошлиғи профилактика инспектори билан воқеа жойига етиб келган.
Самад ака деган туман Солиқ инспекцияси бошлиғига нотўғри иш қилишаётганини айтиб, номарднинг иши бўляпти бу дедим. Бошлиқ ходими менга телефонда кўрсатган қарорининг қоғоз вариантини олиб келган экан. Бошлиқ билан кўп гаплашмадик, ҳокимнинг сайёр қабули бор деб кетди. Икки нафар ходимига кўринглар деб кетганди, лекин ходимлар ҳам бошлиқ кетгач, кетишди. “Участкавой” ҳам воқеани эшитганидан сўнг, ҳеч қандай ҳужжат қилмай, ортига қайтиб кетди. Лекин бир ҳафтадан кейин яна келиб, мендан тушунтириш хати сўради, устимдан солиқчилар арз қилишганини айтди. Бор воқеани ёзиб бердим. 5 сентябрь куни эса қўнғироқ қилиб, эртаси куни суд бўлишини, судга боришим кераклигини айтди, дейди тадбиркор.
Анвар Янгибоевнинг қўшимча қилишича, 2024 йилнинг 6 сентябрь куни мазкур ишни кўриб чиққан Кўкдала туман суди тадбиркорнинг солиқчиларга қилган хатти-ҳаракатини қоралаб, унга 6 сутка маъмурий қамоқ жазосини тайинлаган.
Қашқадарё вилоят Давлат солиқ бошқармаси ахборот хизмати раҳбари Фирдавс Жабборовнинг “Daryo.uz”га билдиришича, мазкур ҳолат бошқарма бошлиғи назоратига олинган.
Ижтимоий тармоқларда “Қашқадарёда солиқ инспекторлари солиқчилар кунини нишонлаб, аввалига ресторанда қарзга еб-ичибди. Бир ҳафтадан кейин ийманибгина пулини сўраган тадбиркорга шартта текширув ташлаб, ресторанини ёпишга уринибди” деган мазмунда хабар тарқалди. Ушбу ҳолат Қашқадарё вилояти солиқ бошқармаси бошлиғи томонидан назоратга олинганлигини, хабарда келтирилган маълумотлар ўрганилаётганлигини маълум қиламиз, дейилади масъуллар изоҳида.
Аввалроқ Қашқадарё вилоятидаги мактаблардан бирида ходимлар ўзини солиқ инспекциясидан келганини айтиб, ўқувчиларга солиқ тўлаш бўйича тушунтириш бергани акс этган видеолавҳалар тарқалганди. Бунга муносабат билдирган Солиқ қўмитаси мактабда бўлган ҳолатни қоралашини маълум қилганди.
Изоҳ (0)