Vyetnamda “Yagi” to‘foni 200 ga yaqin odamning hayotiga zomin bo‘ldi

Vyetnamning shimoliy provinsiyalari so‘nggi yillardagi eng dahshatli ofatlardan biri — “Yagi” to‘foni ko‘plab qurbonlar va vayronagarchiliklarga sabab bo‘ldi.

Uzoq davom etgan yomg‘ir oqibatida yuzaga kelgan kuchli suv toshqini 199 kishini hayotdan olib ketdi. Bu haqda Vyetnam axborot agentligi ma’lum qildi.

Bundan tashqari, jarohatlanganlar soni 807 kishini, bedarak yo‘qolganlar soni esa 128 nafarni tashkil etdi.

Favqulodda xizmatlar Vyetnamning shimoliy mintaqasida sodir bo‘lgan tabiiy ofat katta moddiy zarar keltirganini ma’lum qildi.

26 viloyat va shaharda suv toshqinlari oqibatida 130 ming 268 ta uy vayron bo‘lgan, 57 mingdan ortiq bino suv ostida qolgan.

• Avvalroq Vyetnam shimolida “Yagi” to‘foni oqibatida kamida 14 kishi halok bo‘lgani, 180 dan ortiq kishi yaralangani xabar berilgandi.
• Tabiiy ofatdan eng ko‘p poytaxt Xanoy, Kamfa, Mongkay, Xayfon, Xalong kabi port shaharlari, shuningdek, yaqin atrofdagi Txaybin, Xoabin va Xingyen kabi shimoliy provinsiyalar zarar ko‘rgan.
• Bu hududlarda 400 dan ortiq elektr uzatish liniyalari tayanchlariga va 27 ta elektr podstansiyasiga shikast yetgan.