Кучли “Шаншан” тўфони Япониянинг Кюсю оролидаги Кагосима префектураси қирғоқларига етиб келди, деб ёзади The Japan Times.
Япония Вазирлар Маҳкамаси бош котиби Ёсимаса Хаясининг айтишича, Айти префектурасида содир бўлган кўчки оқибатида камида уч киши ҳалок бўлган, бир киши бедарак йўқолган. NHK маълумотларига кўра, Кюсю оролида 54 нафар киши жабрланган.
Кюшу Electric энергетика компанияси маълумотларига кўра, тўфон туфайли Кюсюнинг еттита префектурасида 255 мингга яқин хонадон электр таъминотисиз қолган. Улардан 220 мингга яқини Кагосима шаҳрида, 16 мингтаси Миязакида жойлашган.
Тўфон Сацумасендай шаҳри яқинига 29 август куни маҳаллий вақт билан тахминан 8:00 да ёпирилган. Синоптикларга кўра, тўфон соатига 15 км тезликда ҳаракатланмоқда. Максимал барқарор шамол соатига 144 км га, шамол эса соатига 216 км га етган.
Кагосима, Миязаки, Оита, Кумамото, Эхиме, Айти ва Сидзуока шаҳарларининг бир қисмида сув тошқини ва кўчки хавфи туфайли эвакуация бўйича буйруқлар эълон қилинган. Юфу шаҳрида кучли ёғингарчилик сабабли Миякава дарёсининг қирғоқдан тошиб кетиши хавфи сабабли фавқулодда ҳолат эълон қилинган.
Япониянинг йирик авиакомпаниялари тўфон Кюсю оролига яқинлашгани сабабли юзлаб рейсларни бекор қилган. Мамлакат темирйўл компаниялари ҳаракатлари ҳам бекор қилиниши мумкинлиги ҳақида огоҳлантирган. Метеорологлар Кюсю оролининг айрим қисмларида ёғингарчиликнинг интенсивлигини кунига 400-600 мм деб ҳисоблашмоқда.
Изоҳ (0)