Тожикистон президенти Эмомали Раҳмон “миллий маданиятга ёт” кийимларни кийишни тақиқловчи “тантаналар ва маросимлар тўғрисида”ги қонунни имзолади. Бу ҳақда президент матбуот хизмати хабар берди.
Мазкур қонун лойиҳасини Тожикистон президенти парламентга тақдим этган, қуйи палата депутатлари уни қабул қилган, 19 июнь куни эса сенаторлар маъқуллаган. Қонунга риоя қилмаганлик учун жарима белгиланган, бироқ ҳозирча қайси турдаги кийимлар “миллий маданиятга ёт”, сотиш ва кийиш тақиқлангани аниқ белгиланмаган.
Тожикистондаги кўплаб аёллар ижтимоий тармоқларда ҳижобли аёлларни кўчада тўхтатиб, ҳижобини ечишни ёки рўмол ўрашни талаб қилишаётганини айтмоқда. Ҳижобли аёлларни поликлиникалар ва шифохоналарга киритмаслик ҳолатлари ҳам кузатилган. Ҳижоб сотиш тақиқланган кийим-кечак бозорларида рейдлар ўтказилган.
Бундан ташқари, байрам ва маросимлар тўғрисидаги қонун эндиликда “идгардак”ни тақиқлашни назарда тутади, яъни болаларнинг ҳайитлик совғаси йиғиш мақсадида уйма-уй айланишига рухсат берилмайди.
Тожикистон расмийлари тақиқ сабабини болалар хавфсизлиги ва уларни тўғри тарбиялаш билан изоҳлаган. Уламолар кенгаши ҳам мамлакат аҳолисига “идгардак” анъанаси шариат нормалари ва ҳанафий мазҳабига зидлигини маълум қилган.
Изоҳ (0)