Ўзбекистон 2023 йил якунларига кўра энг йирик узум экспорт қилувчи давлатлар рейтингида пастлади.
EastFruit таҳлилчиларига кўра, мамлакат 2020 йилда узум экспорти бўйича дунёда 9-ўринда бўлган бўлса, 2023 йилга келиб бирданига 11 ўринни йўқотди ва 20-ўринга илинди.
Шу билан бирга, экспорт ҳажми бир йилда 8 марта пасайди. Бу ҳақиқий узум фалокати — аномал совуқ туфайли катта майдонларда узумзорларнинг нобуд бўлиши натижаси бўлди. Қўшни мамлакатларда ҳам узумзорларнинг катта қисми нобуд бўлди.
Қайд этилишича, узумзорларнинг нобуд бўлиши мева-сабзавот саноати учун оғир зарба бўлди, чунки хўраки узум мамлакатнинг асосий экспорт маҳсулоти ва Ўзбекистондаги кўплаб кичик фермерлар учун энг муҳим даромад манбаи бўлган.
Шу билан бирга, йўқотишлар нафақат янги мева экспорт саноатига, балки қуритилган мевалар бўйича ҳам таъсир кўрсатди, чунки майиз ҳам Ўзбекистоннинг асосий экспорт маҳсулотларидан биридир, айниқса, аграр соҳада.
Бунда янги узум мураккаб логистика туфайли асосан қўшни мамлакатларга сотилса, майиз экспорти ҳақиқатан ҳам диверсификацияланган эди. Энг аҳамиятли жиҳати, янги хўраки узумларни сотиб олувчи мамлакатлардан фарқли равишда, майиз экспортида юқори даромадли мамлакатлар улуши ортиб бораётган эди.
Таъкидланишича, вазият шу қадар оғирлашдики, Ўзбекистонга узум ҳатто импорт қилинди.
“Бироқ, афтидан, узумзорлар жуда тез тикланганга ўхшайди, чунки бу мавсумда узумнинг асосий навлари ва турларининг аксариятида нархлар бу вақт учун одатий бўлган даражага аллақачон қайтди”, дейилади хабарда
Шу боис таҳлилчилар Ўзбекистондан узум экспорти ҳажми ҳам аста-секин тикланиб бориши эҳтимоли йўқ эмас, деган фикрда.
Маълумот учун, Ўзбекистонда 2021 йил ҳолатига кўра, узум етиштириш бўйича 157 минг гектар майдон мавжуд эди. Uzumчиликда олиб борилаётган ислоҳотлар натижасида ушбу меванинг сифатли ва экспортбоп навларини кўпайтириш учун унга ажратиладиган майдонни кенгайтириш, яъни токзорлар 2025 йилгача 307 минг гектар бўлиши режалаштирилган.
Изоҳ (0)