Ўзбекистон фермер хўжаликлари ва қишлоқ хўжалиги корхоналари томонидан 2023 йилда жаҳон бозорида талаб юқори бўлган, мамлакатнинг тупроқ-иқлим шароитига мос 1 миллион дона уруғсиз узум навлари экилади.
Бу ҳақда Ўзбекистон Қишлоқ хўжалиги вазирлиги ҳамда Қишлоқ хўжалигида билим ва инновациялар миллий маркази ҳамкорлигида ўтказилган матбуот анжуманида маълум қилинди, дея хабар бермоқда EastFruit.
Экспортни кенгайтириш ва ички бозорга етказиб беришни кўпайтириш мақсадида Ўзбекистонда қуйидаги масалаларни қамраб олган «Йўл харитаси» ишлаб чиқилган:
- чет элдаги дипломатик ваколатхоналар (Европа ва Яқин Шарқ мамлакатлари, Қозоғистон, Россия, Беларусь, Украина, Латвия, Корея, БАА, Ҳиндистон, Покистон, Афғонистон ва Хитой) томонидан йирик савдо тармоқлари рўйхати ва буюртмалар портфелини шакллантириш;
- узум экспортини янада қўллаб-қувватлаш мақсадида боғдорчилик ва иссиқхоналарни ривожлантириш агентлиги томонидан тадбиркорларга имтиёзли шартларда 10 миллион доллар миқдоридаги айланма маблағлар ажратилиши;
- узумчилик агрокластерлари, фермер ва деҳқон хўжаликлари, экспорт қилувчи корхоналар ва бошқаларда халқаро стандартларни (ГлобалГ.А.П, Органик ва бошқалар) кенг кўламда жорий этиш.
2022 йилда Ўзбекистондаги мавжуд 181 минг гектар токзорларда (фермер хўжаликларида 129 минг гектар, аҳоли бўйича 52 минг гектар) 1,8 миллион тонна узум етиштириш режалаштирилган эди. 10 ноябрь ҳолатига кўра, ҳосил 1,9 миллион тоннани (105 фоиз) ташкил этди.
Жорий йилда йиғиб олинган ҳосилдан 244 минг тонна янги узум экспорт қилинди (ўтган йилга нисбатан +6 фоиз). 256 минг тонна узум қуритилиб, ундан 64 минг тонна майиз олиниб, экспортга жўнатилди (ўтган йилга нисбатан 1,9 баробар кўп).
Экспорт географияси 11 та янги бозор орқали кенгайтирилди:
- Албания;
- Баҳрайн;
- Болгария;
- Бразилия;
- Венгрия;
- Италия;
- Марокаш;
- Македония;
- Словения;
- Сербия;
- Тунис;
- Испания.
Ўзбекистондан умумий 51 давлатга 138 минг тонна узум етказиб берилган. Энг кўп ўзбек узумлари Россия ва Қозоғистон бозорларида сотилмоқда.
2021—2024 йилларда 48 узумчилик ҳудудида 156 минг гектар янги узумзорлар барпо этилмоқда.
Изоҳ (0)