Кузатишларга кўра, 2023 йил ҳисобидан Ўзбекистон деҳқон бозорларида узум нархи кўтарилган. Буни кимдир қишнинг ўта совуқ келгани билан, яна кимдир экспорт кўпайгани билан боғламоқда.
“Дарё” мухбири Тошкент шаҳридаги бозорларда бўлиб, узум нархларини ўрганди.
Бозорда 23 йилдан буён савдо қилиб келувчи Шарифа Машрапованинг айтишича, ўтган йилларда узум бунчалик даражада қиммат бўлмаган.
“Ўтган, 2022 йилда учумнинг килосини 25-30 минг сўмдан олган бўлсак, бу йил эса 40-45 минг сўмдан оляпмиз. Бугун улгуржи бозордан Ризамат навли узумни 50 минг сўмдан олдим, уни устига 5 минг сўмдан қўйиб сотяпман.
Деҳқонлар қиш совуқ бўлгани боис узумни совуқ уриб кетгани, токларда узум йўқ бўлгани учун нархлар ниоятда қиммат эканлигини айтишяпти.
Бугун улгуржи бозордан Ризамат навли узумнинг килосини ўртача 80 минг сўмдан оляпмиз. Энг арзон Ҳусайини навли узумни эса 15-18 минг сўмдан сотиб оляпмиз. Кетмон, Келин бармоқ навли узумларнинг килосини 30 минг сўмдан олиб устига 5 минг сўм қўйиб сотдим”, — деди Шарифа Машрапова.
Яна бир сотувчи Шаҳрам Турсуналиевнинг айтишича, узум нархи тенг бараварга қимматлаган, сотувда эса узум 4-5 бараварга камайган.
“Бозорда 8 йилдан буён сотувчилик қиламан. Узум бу йил камроқ. Шуни ҳисобидан қиммат. Ризамат навли узумлар йўқ ҳисоби. Қимматлиги учун харидорлар томонидан сотиб олиш сусайган. Ҳар йили кунига 10-15 яшик узум сотган бўлсам, бу йил эса зўрға 3-4 яшик узум сотиляпти.
Ризамат навли узумнинг нархи бир кило гўшт нархига чиқди. Узум навига қараб 30 минг сўмдан 100 минг сўмгача сотиляпти. Энг қиммат узум улгурчи бозорнинг ўзида 180-200 минг сўмдан бериляпти. Уни фақат буюртма қилинса, олиб келиб берамиз”, — деди сотувчи.
Асли фарғоналик сотувчи Зиёдулло Турсунов ҳам ўтган йилги узум ҳосили кўп бўлгани, бу йил эса совуқ уриши ҳисобига камроқ эканини таъкидлади.
Изоҳ (0)