Араб мувофиқлаштириш гуруҳи (AMG) Қозоғистон лойиҳаларига 7 миллиард доллар сармоя киритишни режалаштирмоқда. Бу ҳақда Қозоғистон бош вазири матбуот хизматига таяниб Казтаг хабар берди.
“Эришилган келишувлар доирасида Қозоғистон иқтисодиётига узоқ муддатли тўғридан тўғри инвестициялар ҳажми дастлабки босқичда 7 миллиард долларни ташкил қилиши мумкин. Келгусида улар молиялаштириш ҳажмини оширишни режалаштирмоқда”, дейилади хабарда.
Остона шаҳрида Ислом тараққиёт банки, Саудия тараққиёт жамғармаси, ОПЕК Халқаро тараққиёт жамғармаси, Кувайт Иқтисодий тараққиёт жамғармаси ва Абу-Даби тараққиёт жамғармаси каби институтларни бирлаштирган Араб мувофиқлаштириш гуруҳининг давра суҳбати бўлиб ўтди.
Учрашув давомида AMG томонидан Қозоғистон учун устувор аҳамиятга эга бўлган инфратузилма ва ижтимоий лойиҳаларни молиялаштиришга алоҳида тўхталиб ўтилди.
Қайд этилсиҳича, давра суҳбати доирасида транспорт, энергетика, сув ресурслари, соғлиқни сақлаш соҳаларидаги лойиҳалар тақдимоти ўтказилган, Қозоғистоннинг 2030 йилгача бўлган миллий инфратузилма режаси тақдим этилган.
Учрашув якунлари бўйича томонлар давра суҳбати баённомасини, Қозоғистон ҳукумати ва ОПЕК жамғармаси ўртасида хусусий сектор операциялари бўйича доиравий битим, Сув хўжалиги ва ирригация вазирлиги ҳамда Ислом тараққиёт банки ўртасидаги музокаралар баённомаси имзоланди.
Изоҳ (0)