Мюнхендаги Исроил консуллиги олдида отишма содир бўлди (видео)

Мюнхен марказида 5 сентябрь куни эрталаб отишма содир бўлди.  Бу ҳақда Бавария пойтахти полициясига таяниб Deutsche Welle хабар берди.

Қайд этилишича, полиция воқеа жойига – шаҳар марказидаги Миллий социализм тарихини ҳужжатлаштириш марказига зобитларни юборган. Исроил Бош консуллиги ушбу марказ яқинида жойлашган.

“Каролиненплац ҳудудида полиция шубҳали шахсга қарата ўт очди, у яраланди”, деб ёзади Мюнхен полицияси Х ижтимоий тармоғида.

Воқеа содир бўлган жой ўраб олинган. Билдънинг таъкидлашича, гумонланувчи узун стволли қурол билан қуролланган. Эркак машинасини Ҳужжатлар марказига ҳайдаб, бино олдида жойлашган полиция постига қарата ўт очган. Полиция ходими жавобан ўқ узган. Полиция матбуот хизмати ходимлари ёнида ўқотар қурол бўлган эркакни пайқашганини маълум қилган. Полиция ўз хизмат қуролларини қўллаган, ўқ эркакка тегиб, уни яралаган.

Полиция ҳодиса билан боғлиқ бошқа шубҳали шахслар борлиги ҳақида маълумотга эга эмаслигини билдирган. Потенциал гувоҳлардан воқеа жойида олинган фотосуратлар ва видеоларни махсус порталга юклаш ёки терговга ёрдам бериш учун энг яқин полиция бўлимига бериш сўралган. Шу билан бирга, полиция фуқароларни воқеа жойидан олинган сурат ва видеоларни ижтимоий тармоқларда тарқатмасликка чақирган.

Мюнхен хавфсизлик конференцияси вакилига кўра, эрталаб соат 9:10 атрофида камида ўнлаб ўқ овозлари эшитилган. Воқеа жойида полиция кучайтирилган тартибда ишламоқда.

Исроил ТИВ Мюнхендаги Бош консуллиги ходимлари жабрланмаганлигини маълум қилган.