Португалиялик футболчи Криштиану Роналду Европа Чемпионлар Лигасида яна бир бор иштирок этиш эҳтимолини инкор этмади.
Ҳозирда Саудиянинг “Ан-Насср” жамоасида фаолият олиб бораётган ҳужумчига турнир тарихидаги энг яхши тўпурар соврини топширилди. Роналду Чемпионлар Лигасида 183 та ўйин ўтказиб, 140 та голга муаллифлик қилган.
УЕФА раҳбари Александер Чеферин Монакода бўлиб ўтган ЕЧЛнинг янги мавсуми учун қуръа ташлаш маросимида форвардни тақдирлади ва 39 ёшли футболчи ушбу турнирда энди иштирок этмаслиги борасида ҳазиллашди.
“Мен Осиё Чемпионлар Лигасида иштирок этаман, буни унутманг.
Бу ерда бўлиш ёқимли. Ажойиб соврин учун миннатдорман, бу мен учун жуда кўп нарсани англатади. Чемпионлар Лигаси футболдан бир бош устун туради. Рекордимнинг ўзи анча нарсани билдириб туради, аммо бу мусобақада иштирок этиш завқи бошқача. Бу бизнинг мотивация бўлган.
Футболда нима бўлишини олдиндан билиб бўлмайди. Келажакда балки яна мени кўрарсиз”, — дейди Роналду.
Криштиану Роналду Европадаги фаолияти давомида “Спортинг”, “Манчестер Юнайтед”, “Реал” ҳамда “Ювентус” клубларида ўйнаган. 2023 йилдан буён Осиё жамоаси бўлмиш “Ан-Насср” шарафини ҳимоя қилиб келмоқда.
Изоҳ (0)