Таниқли актриса Раъно Шодиева “Ҳудуд 24” YouTube каналига берган интервьюсида “Мендирман Жалолиддин” сериалида қанча гонорар олгани ҳақидаги саволга жавоб берди.
— “Мендирман Жалолиддин” сериалида айнан қанча гонорар олганимни айта олмайман. Чунки Туркия продюсерлик компанияси билан тузган шартномамизда бу тижорат сири сифатида кўрсатилган. Лекин бир нарсани айта оламанки, биринчи ва иккинчи мавсумдаги гонорарим тўлиқ даволанишимга кетди. Биз турмуш ўртоғим билан уй олишни ният қилгандик, лекин бу пуллар менинг даволанишимга насиб қилган экан.
Актриса, шунингдек, келажакда келини билан биргаликда шахсий брендини яратиш режаси ҳақида ҳам сўзлаб берди.
— Узоқ йиллар мобайнида ательеда ишлаганимни кўпчилик билади. Мен жуда яхши бичувчиман. 16 йил давомида “Буюк ипак йўли” метро бекатида жойлашган ательелардан бирида бичувчи бўлиб ишлаганман. Кейин эса мен ўсишни, бошқа йўналишларда ўзимни синаб кўришни истадим. Келиним тўқимачилик ва енгил саноат институтини битирган ва у кичкиналигидан ателье очишни орзу қилар экан. У ўз брендини яратишни хоҳлаяпти. Ҳозирда келиним билан биргаликда ишлаяпмиз, уни қўлдан келганча қўллаб-қувватлайман.
Раъно Шодиева саратондан тузалганидан сўнг ҳаётга бўлган муносабати ҳақида ҳам гапирди.
— Кўпчилик менга сиз бойсиз, деб ёзишади. Мен боймасман, менинг қалбим бой. Касал бўлиб ётганимда, турмуш ўртоғим Тошкентда қўлларини чўзиб, ҳамма жойдан пул излади. Ўша вазиятда мен уларни ёнимга чақирмадим, чунки бу ерда пул топиш керак эди. Тузалганимдан сўнг ҳаётга бўлган муносабатим бутунлай ўзгарди. Эрталаб туриб кўзимни очсам, ҳеч қаерим оғримаяптими, ҳаттоки бирор жойим оғриса ҳам, кўзимни очганимга шукр қиламан.
Раъно Шодиевага бир неча йил аввал жигар саратонининг охирги босқичи ташхиси қўйилган эди. У Туркияда олиб борилган даволанишлар ва бир нечта операциядан сўнг соғлом ҳаётга қайтди. Актриса бир неча кун аввал Туркияга қайта кўрикка боргани ҳамда ҳамма таҳлиллар яхши чиққани ҳақида ҳам сўзлаб берган эди.
Изоҳ (0)