“Gonorarim to‘liq davolanishimga ketdi”. Ra’no Shodiyeva “Mendirman Jaloliddin”dagi ishtiroki uchun qancha pul olgani haqida

Taniqli aktrisa Ra’no Shodiyeva “Hudud 24” YouTube kanaliga bergan intervyusida “Mendirman Jaloliddin” serialida qancha gonorar olgani haqidagi savolga javob berdi. 

— “Mendirman Jaloliddin” serialida aynan qancha gonorar olganimni ayta olmayman. Chunki Turkiya prodyuserlik kompaniyasi bilan tuzgan shartnomamizda bu tijorat siri sifatida ko‘rsatilgan. Lekin bir narsani ayta olamanki, birinchi va ikkinchi mavsumdagi gonorarim to‘liq davolanishimga ketdi. Biz turmush o‘rtog‘im bilan uy olishni niyat qilgandik, lekin bu pullar mening davolanishimga nasib qilgan ekan.

Aktrisa, shuningdek, kelajakda kelini bilan birgalikda shaxsiy brendini yaratish rejasi haqida ham so‘zlab berdi. 

— Uzoq yillar mobaynida atelyeda ishlaganimni ko‘pchilik biladi. Men juda yaxshi bichuvchiman. 16 yil davomida “Buyuk ipak yo‘li” metro bekatida joylashgan atelyelardan birida bichuvchi bo‘lib ishlaganman. Keyin esa men o‘sishni, boshqa yo‘nalishlarda o‘zimni sinab ko‘rishni istadim. Kelinim to‘qimachilik va yengil sanoat institutini bitirgan va u kichkinaligidan atelye ochishni orzu qilar ekan. U o‘z brendini yaratishni xohlayapti. Hozirda kelinim bilan birgalikda ishlayapmiz, uni qo‘ldan kelgancha qo‘llab-quvvatlayman.

Ra’no Shodiyeva saratondan tuzalganidan so‘ng hayotga bo‘lgan munosabati haqida ham gapirdi. 

— Ko‘pchilik menga siz boysiz, deb yozishadi. Men boymasman, mening qalbim boy. Kasal bo‘lib yotganimda, turmush o‘rtog‘im Toshkentda qo‘llarini cho‘zib, hamma joydan pul izladi. O‘sha vaziyatda men ularni yonimga chaqirmadim, chunki bu yerda pul topish kerak edi. Tuzalganimdan so‘ng hayotga bo‘lgan munosabatim butunlay o‘zgardi. Ertalab turib ko‘zimni ochsam, hech qayerim og‘rimayaptimi, hattoki biror joyim og‘risa ham, ko‘zimni ochganimga shukr qilaman.

Ra’no Shodiyevaga bir necha yil avval jigar saratonining oxirgi bosqichi tashxisi qo‘yilgan edi. U Turkiyada olib borilgan davolanishlar va bir nechta operatsiyadan so‘ng sog‘lom hayotga qaytdi. Aktrisa bir necha kun avval Turkiyaga qayta ko‘rikka borgani hamda hamma tahlillar yaxshi chiqqani haqida ham so‘zlab bergan edi.