Ўзбекистонда хизмат кўрсатган артист Раъно Шодиева 12 август 44 ёшни қаршилади. Мафтункор актриса ҳамиша хотиржам кўринса-да, ҳаётда кўплаб синовларни енгиб ўтган. Хўш, у қачондан ижодини бошлади ва қандай тўсиқларни енгиб ўтди. Келинг, бу каби саволларга жавоб излаймиз.
“Мен раққоса бўламан”
— Оилада иккита фарзандмиз. Ота-онам акам иккимизнинг таҳсил олишимиз учун бор имкониятларни яратиб берган. Ҳар йили ёзда Россиядаги энг яхши оромгоҳларга бориб дам олардик. Онам ўзига нисбатан эътиборли ва ҳамиша энг қиммат муаллифлик либосларини киярди. Мен эса уларни ўзимга мослаб тикиб олардим. Аммо онам бирор марта бунинг учун уришмаган. Либосларга ўчлигимнинг сабаби рақс билан боғлиқ. “Раққоса чиройли кийимда рақсга тушиши керак”, деган тушунчам бор эди. Хуллас, болаликдан фақат раққоса бўламан деган ният билан улғайганман, — дейди актриса Раъно Шодиева.
“13 ёшимда кинога кириб келдим”
— Илк ролимни 13 ёшимда Қамара Камолованинг “Атроф оппоқ қорга бурканди” фильмида ижро этганман. Кинода суратга тушиш ва кейинчалик актриса бўлиш ҳаёлимда ҳам бўлмаган. Қамара опа нафақат режиссёр, балки ҳаётимдаги муаллим бўлган. Онам ҳамиша ишда бўларди, кўп нарсаларни у инсондан ўрганганман.
Мактабни битирганимдан кейин қайси касбни эгаллаш ҳақида кўп ўйлаганман. Шунда дадам дизайнерлик бўйича ўқишни таклиф қилган. “Конструктор-дизайнер” мутахассислигини эгаллаб, 16 йил давомида ательеда ишлаганман.
“Танзила Норбоеванинг шахсий дизайнери бўлганман”
— Опа билан ательеда ишлаб юрган пайтимда танишганмиз. Бу соҳадан кетганимдан кейин афсуски Танзила опага ҳеч нарса қилиб бера олмадим. Ҳали ҳам ўзимни кечира олмаяпман. Яқинда кўришганимизда ҳам кўйлак, костюмлар тикиб берсанг бўлар экан деб қолдилар. Кейин мен Туркияга кетиб қолдим ва бу илтимосларини бажара олмадим, — дейди актриса.
“18 ёшимда ‘Чимилдиқ’га чақиришди”
— 18 ёшимда Мелис Абзалов “Чимилдиқ” фильмига таклиф этди. Бу ролни театрда Мадина Мухторова қойилмақом ижро этган. Ундек ижро эта оламанми, деб иккилангандим. Ундан кейин “Шайтанат” фильмининг кастингига таклиф қилишди. Ростини айтсам, бу фильм ҳақида, умуман асар ҳақида ҳеч қандай маълумотга эга эмасдим. Чунки фақат рус тилидаги китобларни ўқирдим. Зайнаб роли учун жуда кўп актрисалар кастинг топширишган, кейин билсам бу ролни аввалига Наврўза Бийназова ижро этган ва қандайдир сабабларга кўра суратга тушишни истамай қолган экан. Наврўза опа билан бир “дом”да турардик. Муносабатларимиз жуда яхши, аммо бирор марта нега ролдан кетгани ҳақида сўрамаганман, — дейди актриса Раъно Шодиева.
“Озодбек Назарбеков билан курсдошман”
— Кинодаги ролларим муваффақиятли чиқишни бошлаганидан кейин бу соҳада ҳам таҳсил олишга қарор қилганман. Жуда машҳур инсонлар Озодбек Назарбеков, Ҳалимахон каби ижодкорлар билан курсдош бўлганман. Ундан кейин магистратурада ҳам таҳсил олдим. “Қўғирчоқ театр актёрлиги” бўлимида таҳсил олиб, кар-соқов болалар учун спектакллар саҳналаштиришни ният қилгандим. Аммо институтдан иш таклиф қилишди ва беш йил давомида устозлик ҳам қилдим. Аммо институтда ишлаб, ижоддан бир оз узилгандек бўлдим. Шу боис, устозликни тарк этиб, бор эътиборимни ижодга қаратдим, — дейди актриса Раъно Шодиева.
“Онам сабаб хайрия ишларини бошладим”
— Онам имконияти чекланган болаларнинг маданият марказида ишларди. Бир куни “Сен таниқли актрисасан, нега менга ёрдам бермайсан”, деб қолди. Аввалига онамни ранжитмаслик учун хайрия ишларида қатнашиб юрдим. Аммо у ердаги муҳит билан яқиндан танишиб, болажонларга меҳрим тушиб қолди. Улар шу қадар меҳрлики, инсонни ўзига оҳанрабодек тортади. Айни кунда бу соҳада нафақат, онам ва мен, балки қизим ҳам фаолият юритади, — дейди актриса Раъно Шодиева.
“Турмуш ўртоғим билан бошқа-бошқа инсонлармиз”
— Мен тошкентлик, турмуш ўртоғим эса қашқадарёлик инсон. Аслида дунёқарашимиз ва одатларимиз ҳам бир-бирига мос эмас. Масалан мен нозикликни ёқтираман, турмуш ўртоғим эса чапани самимий инсон. Ҳатто, яхши кўрадиган нарсаларимиз ҳам бир-биридан фарқ қилади. Аммо турмуш ўртоғим оилапарвар ва аёлини қадрлайдиган инсон. Оиламиз учун ҳамма имкониятни яратиб беради. Шу кунгача рўзғор харажатлари ҳақида бош қотирган инсон эмасман, — дейди актриса Раъно Шодиева.
Оғир хасталикни енгган актриса
.jpg)
— Жигаримнинг 60 фоизини олиб ташлашди ва соғломини қолдиришди. Жигар — бу ўсадиган аъзо. Худо хоҳласа, олиб ташланган ўша фоизи бир йил давомида яна ҳам ўсиб, жойига тушади. Осон амалиёт бўлмади, жуда қийин, машаққатли. Жигарнинг ўзи 300 та функцияни бажаради. Унда қон томирлари кўп. Шунинг ҳаммасини жой-жойига тикиб, амалга ошириш керак, — дейди актриса.
Раъно Шодиеванинг “Меҳрли қўллар”и
— Сурдо тили оиламиз учун янгилик эмас. Дадамнинг эшитиш билан боғлиқ нуқсони бўлгани учун болалигимиздан бу тилни ўрганишга ва у орқали дадам билан эркин мулоқот қилишга ҳаракат қилганмиз. 2003 йили уч ойлик курсга қатнадим ва сурдо таржимони мутахассислигини эгалладим. Ҳозирги кунда бу тилда эркин мулоқот қила оламан. Ҳатто фарзандларим ҳам буни ўрганишган.
Болалигимдан имконияти чекланган инсонларга бефарқ бўлмаганим учун “Қўллар ёрдамида гаплашамиз” номли ташкилотни йўлга қўйгандим. Ундан кейин унинг қамрови янада мукаммаллашиб, эшитиш, кўриш, гапириш билан боғлиқ имконияти чекланган болалар ва ёшлар ташкилотини туздик. Ҳозирги кунда раҳбарлигимдаги “Меҳрли қўллар” ёшлар ва болалар маркази имконияти чекланган қатлам вакилларининг ҳаётга мослашувчанлигини оширишга ўз ҳиссасини қўшмоқда, — дейди актриса Раъно Шодиева.
Маҳоратли актриса энди бувижон
Актриса 2021 йили ўғли Диёрни уйлантирди. Қизиғи шундаки, унинг келини рус миллатига мансуб. Орадан кўп ўтмай қизи Рахшонани ҳам турмушга берди. Ҳозирда актрисанинг икки нафар набираси бор.
“Жигаримнинг 60 фоизи олиб ташланди”
Афсуски, 2022 йили актрисада жиддий хасталик аниқланди.
— Жигаримнинг 60 фоизи олиб ташланди ва соғлом қисмини қолдиришди. Жигар бу – ўсадиган нарса. Унинг олиб ташланган қисми Худо хоҳласа 1 йил ичида ўсиб жойига тушади. 11 соат давом этган амалиёт осон бўлмади, жуда қийин, машаққатли бўлди. Жигарнинг организм ишида 300 та функцияси бор, жигарда қон томирлари кўп. Уларнинг ҳаммасини жой-жойига қўйиб тикиш керак бўлди, — деб касаллиги ҳақида маълумот берганди актриса Раъно Шодиева.
У Туркияда жарроҳлик амалиётини бошдан кечириб, узоқ йиллик даволанишдан сўнг оиласи бағрига қайтди. Сўнгги маълумотларга қараганда, актрисанинг бугунги кундаги саломатлиги жойида, яқин кунларда у яна ижодга қайтишни режалаштирмоқда.
Изоҳ (0)