“An-Nassr” hamda Portugaliya terma jamoasi hujumchisi Krishtianu Ronaldu Saudiya Arabistoniga ko‘chib o‘tishdagi qiyinchiliklar haqidagi savolga javob berdi.
Futbolchining so‘zlariga ko'ra, “An-Nassr”ga o‘tish uning uchun muammo bo‘lmagan, chunki uning butun hayoti shunday ko‘chishlardan iborat bo‘lgan.
“Mening butun hayotim qiyinchiliklarga to‘la. Katta shaharda yashash uchun 11 yoshimda uydan chiqib ketdim. Bu men uchun oson edi. Men Madeyradan Lissabonga, Lissabondan Angliyaga, Angliyadan Ispaniyaga, keyin Italiyaga va shundan so‘ng Angliyaga qaytib keldim. Men uchun ko‘chish muammo emas”, deya javob berdi Ronaldu o‘zining YouTube kanalidagi suhbat chog‘ida.
Ma’lumot uchun, 39 yoshli forvard “Manchester Yunayted” bilan shartnomasini bekor qilgandan so‘ng, 2023-yilning yanvaridan buyon “An-Nassr”da to‘p surmoqda. Ushbu davr mobaynida 49 uchrashuvda maydonga tushgan futbolchi 51 bor raqiblar darvozasini ishg‘ol qildi.
Avvalroq futbolchining YouTube’dagi kanali eng tez o‘suvchi kanal sifatida e’tirof etilib, Ginnes rekordlari kitobiga kiritilgani, hozirda ushbu kanalga 50 milliondan ortiq foydalanuvchi obuna bo‘lgani ma’lum qilingandi.
Izoh (0)