Дарвин Нуньес 5 ўйинга, Роналд Араухо эса 3 ўйинга четлатилди. Уругвай футболчиларига жазо қўлланди

Дарвин Нуньес Уругвай терма жамоасининг 5 ўйинига четлатилди.

“Ливерпуль” ҳужумчиси Америка Кубоги ярим финалидан ўрин олган Урувгай ва Колумбия терма жамоалари ўртасидаги баҳсдаги вазият учун дисквалификация қилинди.

Эслатиб ўтамиз, Колумбияга қарши ўйиндаги мағлубиятдан сўнг (0:1) Уругвайнинг бир неча футболчиси ҳамда ходимлари трибунадаги томошабинлар билан тортишиб қолганди. Кейинчалик Нуньеснинг трибуна томонга стул улоқтиришга уринаётгани акс этган видеолар тарқалди.

Дарвин Уругвай терма жамоасининг ЖЧ—2026 саралашидан ўрин олган Парагвай, Венесуэла, Перу ҳамда Эквадорга қарши ўйинларини ўтказиб юборадиган беш нафар футболчидан бири. Шунингдек, ҳужумчи 20 минг доллар жарима ҳам тўлайдиган бўлди. Тақиқ клубдаги ўйинларга тегишли эмас, Нуньес “Ливерпуль”даги фаолиятини давом эттириши мумкин бўлади.

Ундан ташқари “Тоттенҳэм” ярим ҳимоячиси Родриго Бентанкур ҳам 4 та ўйинга четлатилган ва 16 минг доллар жаримага тортилган, Хосе Мария Хименес (“Атлетико”), Матиас Оливера (“Наполи”) ва Роналд Араухо (“Барселона”) эса 3 та ўйинга четлатилди ва 12 минг доллар жарима тўлайдиган бўлди. 

Воқеада камроқ рол ўйнаган футболчилар 5 минг доллардан жарима тўлайди. Рўйхатда Матиан Виня (“Фламенго”), Себастьян Касерес (“Америка”), Брайан Родригес (“Америка”), Эмилиано Мартинес (“Мидтюлланд”), Сантяго Меле (“Атлетико Хуниор”) ва Факундо Пелйистри (“Панатинайкос”) каби футболчилар бор.

Уругвай футбол федерацияси эса 20 минг доллар жаримага тортилди.