Актрисанинг ҳақиқий исми — Лалита Рани. У 1962 йилнинг 3 апрель санасида Андҳра-Прадеш жанубидаги кичик Ражаҳмундри шаҳрида оддий оилада туғилган. “Ҳа, отам фильмлар билан боғлиқ ва баъзи лойиҳаларни молиялаштирган, бироқ менинг тарбиям жуда босиқ эди. Болалигимдан шифокор бўлишни орзу қилардим, бироқ онам таълим билан бир қаторда рақс ва мусиқага эътибор қаратди, шунинг учун етти ёшимда мен рақс тўгарагига ёзилдим”, —дейди Лалита.
“Мен ҳам ёшлигимдан НТРга қойил қолдим ва бир куни жасоратимни тўплаб, амакимдан кумирим билан учрашишни сўрадим. Амаким Чиннайда фильмларни молиялаштирган ва НТРни шахсан билар эди. Бир кун келиб шундай машҳур юлдузнинг қаҳрамонига айланаман деб ҳеч ўйламагандим” — дея қўшимча қилади актриса.
Лалита кино оламга тасодифан кириб келган. У 9-синфда ўқиётган пайтида мактабнинг йиллик зиёфатида қатнашаётган пайт кинорежиссёр Тилаканинг эътиборини тортган. У Лалитани 1974 йилда намойиш этилган “Ер учун” фильмида рақс билан боғлиқ саҳнани ижро этишга таклиф қилди. Актрисанинг ўзи бу таклифни қабул қилишга журъат эта олмади, аммо унинг ота-онаси хурсанд бўлди ва розилигини билдирди.
Жая Прадa иштирокидаги биринчи фильм 1974 йилда намойиш этилган. Актриса кўплаб интервьюларида биринчи марта камера қаршисида турганида 14 ёшда бўлганини айтган. Маълум бўлишича, кўплаб манбаларда актрисанинг 1962 йилда эмас, 1960 йилда туғилгани айтилган. Кўпинча ҳинд киноси юлдузларининг ҳақиқий ёши яширилади, шунинг учун бу ажабланарли ҳолат эмас.
Лалитанинг гўзаллигига маҳлиё бўлган актёр Прабхакар Редди унга “Ғалаба бахш этувчи” деган маънони англатувчи Жаяпрад тахаллусини таклиф қилади. Шундай қилиб, унинг кинодаги йўли муваффақият билан бошланади. Актрисага режиссёрлар Бапу, Вишванат ва Балачандер эътибор қаратади.
Актриса 14 ёшида таниқли ҳинд актёрлари Ражникантҳ, Чандра Моҳан, Камол Ҳасан билан бирга фильмларда ўйнаган. Бироқ актриса машҳурликка эришиши учун катта бадал тўлади.
“Актёрлик менинг ёшлигимни олиб қўйди, синфдошлар ва дўстлар билан мулоқотни чеклади. Яқинда мактабимда менинг шарафимга дастур уюштирилди. Болаларнинг чиқишларидан кейин саҳнага чиққан ўқитувчим менга қандай мурожаат қилишни билмаслигини айтди: Лалита, Жая Прадa ёки парламент аъзоси, хуллас нима дейишини билмас эди. Унинг кўзларига ёш келди ва мен ҳам йиғладим”, дейди актриса.
Жанубда мувафаққият қозонганидан сўнг, Жая 1979 йилда Риши Капур билан “Қўшиқлар ритмлари” фильмида роли билан Болливудда мувафаққиятга эришди. Бу уч йил олдин чиқарилган ва иккита Миллий кино мукофотига сазовор бўлган телугу тилидаги фильмнинг ремейки эди.
Жая Прадa ўзининг биринчи ҳинд фильмида рол ўйнаганида, кўплаб инсонлар актрисанинг Болливудда ўз ўрнини топа олмаслигини, у ерда ҳеч нарса қила олмаслигини, чунки ҳинд тилида бирорта сўз билмаслигини айтган. Бироқ Жая шунчалик қатъиятли эдики, бир неча йил ичида у ҳинд тилини ўрганди ва 1982 йилда мустақил равишда Ракеш Рошан билан “Дангаса” фильмидаги ролини ижро этди. Бундан ташқари, у кейинчалик бенгал тилини ўрганди ва бу тилда бир нечта лойиҳаларда рол ўйнади.
Актриса иштирокидаги “Шафқатсиз тақдир” фильмидаги она ва қиз роли Жаянинг карьерасидаги энг яхши ролларидан бири ҳисобланади. Жая кинода машҳурликка эришганидан кейин оилали продюсер Шрикант Наҳатни яхши кўриб қолди ва унинг бу қилмиши гап-сўзларга сабаб бўлди. Продюсер рафиқасининг қаршиликларига ва уч фарзандининг кўз ёшларига қарамай, 1989 йилнинг 22 февраль санасида актриса билан турмуш қурди.
Орадан кўп йиллар ўтгач, Жая Прадa: “Эркакнинг ҳаётида “бошқа аёл” бўлиш жуда жароҳатли ҳолат. Бу қанчалик оғриқли ва таҳқирли эканини тасаввур ҳам қила олмасдим. Мен Шрикант учун ҳамма нарсадан воз кечдим, бироқ бошқалардан олганим фақат ҳақорат ва масхара қилиш эди. Менга “жазман” тамғасини қўйиб, орқамдан кулишди”, — деб айтган.
Жая Прадa 1994 йилда “Мамлакат партияси” деб номланган Телугу партиясига қўшилди ва расман сиёсатчи бўлди. Ҳаёт уни тез-тез синовдан ўтказди. Актрисанинг никоҳи бузилди, партияда бўлиниш юз берди ва у сайловларда ютқазди. “Мен ҳеч нарсасиз қолдим — актёрлик ва сиёсатдан айрилдим. Фақат битта: ўз жонимга қасд қилиш истаги бор эди. Бироқ бир куни эрталаб ўрнимдан туриб ўзимга курашишга ваъда бердим.
Ҳозирги кунда Жая Прадa мамлакатнинг сиёсий ҳаётида фаол, у баъзида турли реалити-шоуларда меҳмон сифатида иштирок этади ва 2022 йилда “Симарнинг иккинчи оиласи” ҳинд сериалида эпизод ролни ижро этди.
Изоҳ (0)