Россия Ўзбекистонга маймунчечакни аниқлаш учун “Вектор” илмий маркази томонидан ишлаб чиқарилган тест тизимлари тўпламларини юборади. Бу ҳақда “Роспотребнадзор” матбуот хизмати хабар берди.
26 август куни Россия бош давлат санитария врачи Анна Попова раислигида Евросиё иқтисодий иттифоқига аъзо давлатлар аҳолисининг санитария-эпидемиология фаровонлиги соҳасидаги ваколатли органлар раҳбарлари кенгашининг навбатдан ташқари йиғилиши бўлиб ўтди.
Унда Арманистон, Беларусь, Қозоғистон ва Қирғизистон бош давлат санитария шифокорлари иштирок этган. Шунингдек, Тожикистон ва Ўзбекистоннинг санитария-эпидемиология осойишталиги соҳасидаги ваколатли органлари раҳбарлари таклиф этилган.
Учрашувда маймунчечак касаллиги бўйича ЖССТнинг халқаро аҳамиятга молик фавқулодда ҳолат эълон қилиниши билан боғлиқ вазият муҳокама этилган. Кенгаш аъзоларининг фикрича, ЕОИИ давлатлари, шунингдек, Тожикистон ва Ўзбекистонда маймунчечакнинг тарқалиш хавфи паст деб баҳоланмоқда.
Евросиё минтақасининг барча мамлакатлари чегарада санитария ва карантин назорати чораларини кучайтирди.
Ҳамкорлар Россиядан маймунчечакни аниқлаш учун тест тизимларини тақдим этишни сўраган.
“Тест тизимларининг дастлабки тўпламлари шу ҳафта Ўзбекистонга етказилади”, дейилади хабарда.
ЖССТ август ойининг ўрталарида маймунчечак эпидемияси билан боғлиқ фавқулодда ҳолат эълон қилганди. Бунга Африка қитъасининг айрим ҳудудларида маймун чечаги билан боғлиқ вазият назоратдан чиқиб кетгани сабаб бўлган.
Ўзбекистонда маймунчечак касаллиги четдан кириб келиши ва унинг олдини олиш мақсадида маълум чора-тадбирлар амалга оширилмоқда. Хусусан, санитария-карантин хизмати томонидан аэропортларда ҳаво ҳарорати юқори бўлган йўловчиларни масофадан туриб аниқлайдиган тепловизорлар ўрнатилади.
Санепидқўмита бошлиғи ўринбосари Нурмат Отабеков Ўзбекистонга маймунчечак кириб келиши эҳтимоли мавжудлиги, лекин тарқалиш хавфи жуда пастлигини айтганди. Қўмита берган маълумотга кўра, Ўзбекистон аҳолисининг аксарият қисмида маймунчечакка қарши жамоавий иммунитет мавжуд.
Изоҳ (0)