O‘zbekistonda maymunchechak kasalligi chetdan kirib kelishi va uning oldini olish maqsadida ma’lum chora-tadbirlar amalga oshirilmoqda. Bu haqda Sanitariya-epidemiologiya qo‘mitasi boshqarma boshlig‘i Rustamjon Ikromov ma’lum qildi.
Uning bildirishicha, ushbu kasallikka gumon qilingan holatlar bo‘lsa, ularga laboratoriya tadqiqotini o‘tkazish maqsadida boshqarmalardagi va markazdagi, shuningdek, Respublika virusologiya ilmiy-tadqiqot institutidagi virusologiya mutaxassislari qayta tayyorgarlikdan o‘tkazilgan.
Bugungi kunda maymunchechak kasalligini tashxislash uchun zarur bo‘ladigan diagnostika va test sistemalarini olib kelish yuzasidan ishlar amalga oshirilmoqda.
“Bizda 2023-yilda berilgan test sistemasi ham mavjud. Undan foydalanish yuzasidan ma’lum ishlarni amalga oshiryapmiz. Ya’ni joylarga yetkazib berish va u yerda gumon qilingan holatlarda kasallikni tashxislashdan o‘tkazish yuzasidan ish joyida tajriba almashinuvini amalga oshirish, ya’ni ish joyida ko‘nikma hosil qilish yuzasidan videokonferensiya aloqasi orqali laboratoriya xodimlarining bilim-saviyalari oshirilmoqda”, dedi Rustamjon Ikromov.
Shuningdek, kasallikka gumon holatini erta aniqlash uchun qabulxona va yuqumli kasalliklar shifoxonalarida teri toshmalarining barcha ko‘rinishlari, jumladan, maymunchechagining o‘ziga xos belgilarini aniqlash maqsadida joylarda shifokorlar uchun yaqin kunlarda o‘quv seminarlari tashkil qilish reja qilinganini ma’lum qildi.
Bundan bir necha kun avval Jahon sog‘liqni saqlash tashkiloti maymun chechagi epidemiyasi bilan bog‘liq favqulodda holat eʼlon qilgandi. Bunga Afrika qitʼasining ayrim hududlarida maymun chechagi bilan bog‘liq vaziyat nazoratdan chiqib ketgani sabab bo‘lgan.
Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov O‘zbekistonga maymunchechak kirib kelishi ehtimoli mavjudligi, lekin tarqalish xavfi juda pastligini aytgandi.
Izoh (0)