Ўзбекистонда маймунчечак касаллиги четдан кириб келиши ва унинг олдини олиш мақсадида маълум чора-тадбирлар амалга оширилмоқда. Бу ҳақда Санитария-эпидемиология қўмитаси бошқарма бошлиғи Рустамжон Икромов маълум қилди.
Унинг билдиришича, ушбу касалликка гумон қилинган ҳолатлар бўлса, уларга лаборатория тадқиқотини ўтказиш мақсадида бошқармалардаги ва марказдаги, шунингдек, Республика вирусология илмий-тадқиқот институтидаги вирусология мутахассислари қайта тайёргарликдан ўтказилган.
Бугунги кунда маймунчечак касаллигини ташхислаш учун зарур бўладиган диагностика ва тест системаларини олиб келиш юзасидан ишлар амалга оширилмоқда.
“Бизда 2023 йилда берилган тест системаси ҳам мавжуд. Ундан фойдаланиш юзасидан маълум ишларни амалга оширяпмиз. Яъни жойларга етказиб бериш ва у ерда гумон қилинган ҳолатларда касалликни ташхислашдан ўтказиш юзасидан иш жойида тажриба алмашинувини амалга ошириш, яъни иш жойида кўникма ҳосил қилиш юзасидан видеоконференция алоқаси орқали лаборатория ходимларининг билим-савиялари оширилмоқда”, деди Рустамжон Икромов.
Шунингдек, касалликка гумон ҳолатини эрта аниқлаш учун қабулхона ва юқумли касалликлар шифохоналарида тери тошмаларининг барча кўринишлари, жумладан, маймунчечагининг ўзига хос белгиларини аниқлаш мақсадида жойларда шифокорлар учун яқин кунларда ўқув семинарлари ташкил қилиш режа қилинганини маълум қилди.
Бундан бир неча кун аввал Жаҳон соғлиқни сақлаш ташкилоти маймун чечаги эпидемияси билан боғлиқ фавқулодда ҳолат эълон қилганди. Бунга Африка қитъасининг айрим ҳудудларида маймун чечаги билан боғлиқ вазият назоратдан чиқиб кетгани сабаб бўлган.
Санитария-эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков Ўзбекистонга маймунчечак кириб келиши эҳтимоли мавжудлиги, лекин тарқалиш хавфи жуда пастлигини айтганди.
Изоҳ (0)