ЖССТ маймун чечаги билан боғлиқ халқаро фавқулодда ҳолат эълон қилди

Жаҳон соғлиқни сақлаш ташкилоти маймун чечаги эпидемияси билан боғлиқ фавқулодда ҳолат эълон қилди. Бу ҳақда BBC нашри хабар берди.

Манбада айтилишича, халқаро фавқулодда ҳолат эълон қилинишига сабаб Африка қитъасининг айрим ҳудудларида маймун чечаги билан боғлиқ вазият назоратдан чиқиб кетгани бўлган. Ҳозирда Марказий Африка бўйлаб бир нечта янги эпидемия ўчоқлари пайдо бўлган.

Конго Демократик Республикаси ҳудудида ҳозирга қадар камида 450 киши маймун чечагидан ҳалок бўлган. Ҳозирда эпидемия марказий ва шарқий Африканинг айрим қисмларига тарқалган ва олимлар касалликнинг янги варианти тез тарқалаётгани ва унинг ўлим даражаси юқорилигидан хавотир билдирган.

ЖССТ раҳбари Тедрос Гебреесуснинг айтишича, Африка ва ундан ташқарида эпидемиянинг тарқалиш эҳтимоли “жуда хавотирли”. Зарур чоралар кўрилмаса, маймун чечаги Осиё ва Европа жанубига тарқалиши мумкин.

“Ушбу эпидемияни тўхтатиш ва инсонлар ҳаётини сақлаб қолиш учун мувофиқлаштирилган халқаро жавоб зарур. Инсоният бу эпидемияга жиддий қараши керак”, деган Тедрос Гебреесус.

Маълумот ўрнида, маймун чечаги вируси яқин алоқа, масалан, жинсий яқинлик, терига тегиниш ва ҳаво-томчи усулида юқиши мумкин. Касаллик вируси инсон организмида гриппга ўхшаш симптомларни, терининг шикастланишини келтириб чиқаради. Ҳар 100 нафар бемордан биттасида ўлим ҳолати кузатилиши мумкин.

Йил бошидан бери Конго ДРда 13,700 дан ортиқ касаллик юқиш ҳолатлари қайд этилган. Шунингдек, Африканинг бошқа мамлакатларида — Бурунди, Марказий Африка Республикаси, Кения ва Руандада янги ҳолатлар қайд этилган.

Касалликнинг ҳозирга қадар 4 та штамми қайд этилган. Улар орасида 1b штамми энг тез юқувчи ва ўлдирувчи эканлиги аниқланган. 1b штаммидан ҳозирга қадар дунё миқёсида 140 киши ҳалок бўлган, 87 минг киши касалланган.