Покистон бўйлаб сўнгги уч кун ичида кучли ёмғир ва яшин уриши оқибатида камида 50 киши ҳалок бўлди. Расмийлар айрим ҳудудларда фавқулодда ҳолат эълон қилган. Бу ҳақда Al Jazeera хабар берди.
Маълум қилинишича, буғдой ўраётган деҳқонлар яшин уриши оқибатида ҳалок бўлган. Ёмғир оқибатида шимоли-ғарбий ва шарқий Панжоб провинциясида ўнлаб уйлар қулаб тушган. Панжобда 21 киши ҳалок бўлган, Афғонистон билан чегарадош шимоли-ғарбий Хайбер-Пахтунхвада эса қурбонлар сони 21 кишини ташкил этади. Исломободда ҳам кучли ёмғир ёғган ва жануби-ғарбий Балужистон вилоятида етти киши ҳалок бўлган.
Покистонлик экология бўйича эксперт Рафай Аламнинг айтишича, апрель ойида бундай кучли ёғингарчилик кузатилиши одатий ҳол эмас.
Икки йил олдин Покистон март ва апрель ойларида жазирама тўлқинга дуч келганди. Ҳозир эса ёғингарчиликка гувоҳ бўлмоқдамиз ва бунинг барчаси иқлим ўзгариши билан боғлиқ — деди у.
2022 йилда ёмғир туфайли Покистоннинг учдан бир қисмини сув босганди, 1739 киши ҳалок бўлганди. Табиий офат 30 миллиард доллар зарар келтирган.
Кучли ёмғир ва сув тошқинлари Форс кўрфази минтақасини ҳам қамраб олди. Уммонда камида 18 киши ҳалок бўлди. Бирлашган Араб Амирликларида эса барча парвозлар тўхтатилди. Баҳрайн, Қатар ва Саудия Арабистонида ҳам кучли ёмғирлар кузатилмоқда. Бундан ташқари қўшни Қозоғистонда ва Россияда ҳам сув тошқинлари кузатилиб, талафотларни бартараф этиш ишлари олиб борилмоқда. Афғонистонда ёғингарчилик оқибатида қурбонлари сони 66 кишига етган.
Изоҳ (0)