Сирдарё вилоятининг Гулистон шаҳрида яшовчи аёл эри томонидан аёвсиз калтаклангани, сочи олиб ташлангани ҳақида хабар берилганди. “Дарё” билан мулоқотда бўлган аёлнинг танишига кўра, эридан аёвсиз калтак еган Нилуфар аҳволи абгор ҳолда 20 август куни ярим тунда унинг уйига келган.
![](/static/2024/08/21/photo_2024-08-21_11-33-21-GaKFthMu.jpg)
Ярим кечаси уйимга келган Нилуфарнинг аҳволи жудаям оғир эди. Ички ишларга ёки тез ёрдамга қўнғироқ қилайлик, дедим. Ўлиб қолишидан қўрқдим. Йўқ деди. Қайта-қайта ундадим. Йўқ деявергач, майли, кечаси ухлаб дам олсин, эртага тонгда гаплашамиз, дедим. Лекин минг афсуски, эрта тонгда ҳам эрининг устидан шикоят қилмаслигини, ҳеч кимга хабар бермаслигини айтиб, менга қарши турди, дейди исми сир қолишини сўраган таниш аёл.
Суҳбатдошга кўра, ярим кечаси хонадонига келган Нилуфар ундан яшириниш учун жой сўраган.
Нилуфарнинг ичи тўкиб ташланган эди. Юзлари кўкариб кетган. Кўзлари шишиб ётганди. Эридан қочиб, уйдан чиққанини, уни яшириб қўйишимни илтимос қиларди, дейди у.
Исми сир қолишини сўраган манбанинг билдиришича, Нилуфарнинг турмуш ўртоғи мактабда жисмоний тарбия ўқитувчиси бўлиб ишлайди.
Эри қайсидир мактабда жисмоний тарбия ўқитувчиси бўлиб ишлайди. Нилуфар анчадан бери шу тарзда калтакланиб келади. Аммо ҳеч қаерга шикоят қилмайди. Менинг уйимга қочиб келган куни ҳам уч кун давомида боғлаб қўйилганини, оғзи скотч билан ўралган ҳолда уч кун оч қолганини, тўртинчи куни амаллаб уйдан қочиб чиққанини айтди, дейди суҳбатдош.
“Дарё” мазкур воқеа жамоатчиликка очиқлангач, Оила ва хотин-қизлар қўмитаси ахборот хизмати раҳбари Саодат Боймирзаева билан боғланиб, қўшимча маълумот сўради. Масъул айни пайтда вазиятдан бехабар эканини, бироқ Сирдарё вилояти ҳокимининг хотин-қизлар бўйича масъул ўринбосари билан суҳбатлашаётганини, ҳолат аниқлаштирилгач, маълумот беришини билдирди.
Изоҳ (0)