Шавкат Мирзиёев тадбиркорлар билан тўртинчи очиқ мулоқотдаги нутқида энг кўп тилга олган сўзлар “тадбиркор”, “корхона”, “хизмат”, “экспорт”, “бозор”, “ер”, “банк”, “маҳсулот”, “бизнес”, “лойиҳа”, “ҳудуд” ва “тизим” бўлди. Иқтисодий тадқиқотлар ва ислоҳотлар маркази мутахассислари президентнинг тадбиркорлар билан мулоқоти чоғида нутқини лингвистик таҳлил қилди.
![](/static/2024/08/21/nutq-XyTnq3ii.jpg)
Таҳлил натижаларига кўра, тадбиркорларнинг энг долзарб муаммолари бизнес тўсиқларни қисқартириш ва инфратузилма, ер, энергия билан таъминлаш эканлиги маълум бўлди.
Шавкат Мирзиёев ўз нутқида жами 4 912 сўздан фойдаланган. Хусусан, “тадбиркор” сўзи 103 марта, “корхона” 47 марта, “ер” 41 марта, “хизмат” 28 марта, “экспорт” 26 марта, “бозор” 25 марта, “банк” 23 марта, “маҳсулот” ва “бизнес” 20 марта, “лойиҳа” 19 марта, “ҳудуд” ва унга тегишли сўзлар 18 марта тилга олинган.
![](/static/2024/08/21/photo_2024-08-21_12-49-42-Hg20qE1G.jpg)
Ушбу сўзлар муҳокама қилинаётган масалаларнинг долзарблигини ва иқтисодий ўсишни рағбатлантириш ва ишбилармонлик муҳитини яхшилаш мақсадида уларни ҳал қилишда комплекс ёндашув зарурлигини таъкидлайди.
Бир қатор асосий ибораларга алоҳида эътибор қаратилди. Икки сўздан ташкил топган иборалардан “ишлаб чиқариш” ибораси 8 марта, “қишлоқ хўжалиги” ибораси эса 7 марта тилган олинган. “Ташқи бозор” ва “микромолия ташкилотлари” иборалари 6 марта, “очиқ мулоқот”, “йирик корхоналар” ва “хусусий сектор” иборалари 5 марта айтилган.
Уч сўздан иборат иборалардан “аҳоли ва тадбиркор” ибораси 3 марта, “савдо-саноат палатаси”, “қишлоқ хўжалиги ерлари”, “сунъий интеллект орқали” ва “шаффоф қурилиш тизими” иборалари 2 марта тилга олинган.
![](/static/2024/08/21/photo_2024-08-20_12-52-13-gJG-n_hB.jpg)
Тадбиркорлар билан бўлган охирги 3 та очиқ мулоқотнинг лингвистик таҳлилига кўра, “корхона”, “хизмат”, “экспорт”, “бозор” ва “маблағ” каби асосий атамалардан фойдаланишда сезиларли ўсиш кузатилган. Айниқса, бу ўсиш “хизмат кўрсатиш” соҳасида алоҳида ажралиб туради, бу сўзнинг тилга олиниш сони 2023 йилга нисбатан 3,5 баробарга, “бозор” сўзидан фойдаланиш 2,3 баробар ва “экспорт” сўзи 1,7 баробарга ошган.
Қайд этиш лозим, Ўзбекистонда банд аҳолининг 52 фоизи хизмат кўрсатиш соҳасида меҳнат қилади.
Таҳлилда келтирилишича, президент нутқида бир қатор асосий йўналишлар ва тегишли масалаларга тўхталиб ўтилди. Асосий йўналишларни тақсимлаш ва тегишли сўзлардан фойдаланиш таҳлили шуни кўрсатдики, бизнес учун тўсиқларни қисқартириш йўналишида “ер”, “тадбиркор”, “бизнес”, “банк” ва “кредит” сўзларига катта эътибор берилади. Бу сўзлар тадбиркорлик учун қулай муҳит яратиш муҳимлигини таъкидлайди ва нутқнинг муҳим қисмини ташкил қилади.
“Президентнинг нутқи иқтисодиётни ривожлантириш ва тадбиркорликни қўллаб-қувватлашга стратегик ёндашувини таъкидлайдиган асосий мавзуларга аниқ тузилиш ва эътиборни намойиш этади”, дейилади таҳлилда.
Президентнинг тадбиркорлар билан очиқ мулоқоти ҳақида
Шавкат Мирзиёев 2021 йилдан бошлаб 20 августни Тадбиркорлар куни этиб белгилаган ва уни ҳар йили кенг нишонлашни таклиф қилган. Ўша йили президентнинг тадбиркорлар билан ўтказган илк очиқ мулоқотида ўн мингга яқин тадбиркор иштирок этганди. Шу кунгача барча учрашувлар Тошкент шаҳрида ўтказиб келинган. Президент тадбиркорлар билан 2024 йилги очиқ мулоқоти илк бор Қорақалпоғистонда ўтказилди. Унда Ўзбекистоннинг барча ҳудудларидан 300 га яқин тадбиркор ва инвесторлар тўпланди. Учрашувда тадбиркорлик учун қўшимча шароитлар яратиш масаласида қатор янгиликлар айтилди.
Изоҳ (0)