“АҚШ президент Камала Ҳаррисни қабул қилишга тайёр” — Обама

АҚШнинг собиқ президенти Барак Обама Чикагодаги Демократик партиянинг миллий қурултойида нутқ сўзлаб, бўлажак президентлик сайловларида ўзининг узоқ йиллик сиёсий иттифоқчиси Камала Ҳаррис номзодини қўллаб-қувватлади.

Америка янги бобга тайёр. Америка яхшироқ ҳикояга тайёр. Биз президент Камала Ҳаррис учун тайёрмиз. Камала Ҳаррис эса ишга тайёр, дейди Обама. 

Оқ уйнинг собиқ раҳбари “Ҳа, у уддалайди” дея 2008 йилги президентлик сайловларига борган машҳур шиорини эслаган.

Тахминан 40 дақиқа давом этган нутқида Обама “катта хавф остида демократияни ҳимоя қилган” амалдаги президент Жо Байденга ҳам миннатдорчилик билдирган, шунингдек, Республикачилар партиясидан президентликка номзод Дональд Трампнинг ҳокимиятга қайтишидан огоҳлантирган.

Бизга яна тўрт йиллик шов-шув, чалкашлик ва тартибсизликлар керак эмас. Биз бу фильмни аввал ҳам кўрганмиз, давоми одатда ёмонроқ бўлишини ҳаммамиз биламиз, дея қўшимча қилган Обама.

4500 нафардан ортиқ делегат иштирок этган Демократик партиянинг миллий қурултойида собиқ биринчи хоним Мишел Обама ҳам сўзга чиққан.

Америка, умид қайтмоқда, дейди у йиғилганларга.

Собиқ биринчи хоним Ҳаррисни “президентликка номзод бўлган энг малакали шахслардан бири” деб таърифлаган.