Эронда Покистондан Ироққа шиа зиёратчиларни олиб кетаётган автобуснинг автоҳалокатга учраши оқибатида камида 35 киши ҳалок бўлди, 20 дан ортиқ киши жароҳатланди. Бу ҳақда Radio Pakistan агентлиги хабар берди.
Ҳодиса бир кун аввал кечқурун Язд провинциясидаги Деҳшир-Тафт қиялигида содир бўлган. Дастлаб автобуснинг 28 нафар йўловчиси ҳалок бўлгани, яна 23 нафари жароҳатлангани ҳақида хабар берилган эди.
Маълум бўлишича, автобус мамлакатнинг шарқий чегараларидан кириб келган ва мамлакат ғарбий чегаралари ва Ироқ томон ҳаракатланаётган бўлган.
Воқеа содир бўлганидан бир неча дақиқа ўтгач, шифокорлар ва йўл ҳаракати полицияси гуруҳи воқеа жойига етиб келган.
Йўл ҳаракати полицияси мутахассислари томонидан олиб борилган дастлабки терговга кўра, ушбу автобуснинг ағдарилишига асосий сабаб тормоз тизимининг техник носозлиги бўлиб, катта қиялик туфайли ҳайдовчи бошқарувни йўқотиб қўйган ва ЙТҲ содир бўлган, дейилади хабарда.
Изоҳ (0)