Август ойида ота-оналарни ўйлантирадиган энг катта муаммо албатта мактаб бозори билан боғлиқ. Уларнинг олдида ўқув қуроллари-ю мактаб формасини харид қилиш масаласи кўндаланг туради.
Хўш, бугун мактаб бозорларида нарх-наво қандай? Ота-оналар керакли “китоб-дафтарлар” учун қанча маблағ сарфламоқда? Сизни Тошкентдаги Чилонзор буюм бозори мисолида ўқув қуроллари нархи билан таништирамиз.
Бозордаги мижозлардан сўровнома ўтказилганда, бу йилги мактаб бозоридаги нарх-наво ҳамёнбоплигини айтганлар ҳам, қимматлигидан нолиганлар ҳам бўлди.
Ота-оналар мактаб формаси учун 300 мингдан 1 миллион сўмгача сарфлашини айтди. Ўртамиёна харажат қилинганда, 500-600 минг сўм маблағ кетган.
Ўқув қуролларига эса 80 мингдан бошлаб 500 минг сўмгача сарфланаётгани маълум бўлди.
Савдо расталарининг бирида ўқув қуролларининг нархи сотувчилар томонидан қуйидагича белгиланган:
- 12 варақли дафтар — 500 сўмдан 650 сўмгача;
- 36 варақли дафтар — 1500 сўмдан 1800 сўмгача;
- 48 варақли дафтар — 1800 сўмдан 2200 сўмгача;
- 96 варақли дафтар — 3500 сўмдан 4200 сўмгача;
- Ручка — 800 сўмдан 2000 сўмгача;
- Қора қалам — 800 сўмдан 2000 сўмгача;
- Рангли қаламлар тўплами— 8000 сўмдан 20 000 сўмгача;
- Расм дафтар (альбом) — 7000 сўмдан 15 000 сўмгача;
- Дафтар жилди тўплами — 7500 сўмдан 20 000 сўмгача;
- Картон қоғоз — 15 000 сўм;
- Мактаб портфели — 60 000 сўмдан 150 000 сўмгача.
* нархлар ўрта ҳисобда олинган
Ўзбекистонда 2024/2025-ўқув йилида мактабларда ўқувчилар учун мажбурий форма жорий этилмайди. Бу ҳақда Мактабгача ва мактаб таълими вазирлиги бошқарма бошлиғи Азамат Камолов маълум қилган.
2018 йил ҳукумат томонидан ягона мактаб формалари намуналари тасдиқланган эди. 2018/2019-ўқув йилидан бошлаб ўқувчилар уни ихтиёрий тартибда кийишга ҳақли экани белгилаб қўйилган. Мактаб формалари мажбурий бўладиган сана 2019/2020-ўқув йилидан 2024/2025-ўқув йилига – 5 йилга кечиктирилганди. Вазирлар Маҳкамасининг қарорига тегишли тузатишлар киритилган бўлиб, ягона мактаб формаси 2025 йилга қадар босқичма-босқич жорий этиб борилиши белгиланган.
Харидорлар орасида нарх-наводан қониқаётганлар талайгина. Ҳатто нархлар ўтган йилгидан арзонлашгани ҳақида айтилмоқда. Сотувчиларнинг ўзи фарзандининг ўқув қуроли учун қанча маблағ ажратмоқда?
— “Ўзим сотувчи бўлганим сабабли танишлардан нархларни келиштириб, фарзандларимга форма ва ўқув қуроллари сотиб оламан. Шунда ўртача 1-1,5 миллион сўм атрофида пул кетади”, дейди кийим-кечак сотувчиси.
— “Нархлар ўтган йилгидан анча пасайган, талаб тушган, мижозлар кам. Ўзим фарзандларимга чидамли, сифатли кийимлар харид қиламан. Шунда ҳар бирига 100 доллардан маблағ кетади”, деди мактаб формаси билан савдо қилувчи суҳбатдошимиз.
Видеони тўлиқ ҳолда қуйидаги ҳавола орқали томоша қилишингиз мумкин.
Изоҳ (0)