Сўровнома: болаларнинг 60 фоизидан ортиғи ўз ҳуқуқларини ҳимоя қила олмайди

Олий Мажлис Сенати раиси Танзила Норбоева 23 ноябрь — Жаҳон болалар кунини муносабати билан болалар ҳамда нодавлат нотижорат ташкилот вакиллари билан учрашди. Унда бола ҳуқуқлари бўйича ўтказилган U-Report сўрови натижалари эълон қилинди.

Сўровномада 1 минг 800 дан ортиқ респондент бола ҳуқуқларини амалга ошириш бўйича ўз фикрларини билдирган.

Сўров натижаларига мувофиқ, респондентларнинг тўртдан бир қисмидан озроғи (22 фоиз) бола ҳуқуқлари бузилган тақдирда, уларни қандай ҳимоя қилишни билади.

Баъзи болалар ўз ҳуқуқлари ҳақида гапиришдан уяладилар (16 фоиз) ёки ўз ҳуқуқларини ҳимоя қилишга ҳаракат қилсалар, жазоланишдан қўрқадилар (13 фоиз).

Болаларнинг 60 фоизидан ортиғи, агар уларнинг ҳуқуқлари у ёки бу сабабларга кўра бузиладиган бўлса, ўз ҳуқуқларни ҳимоя қила олмасликларини айтишган.

Сенат мажлисининг ёш иштирокчилари болаларнинг энг кўп бузиладиган ҳуқуқлари юзасидан ўз фикрларини билдирган. Унда мактабга бормаслик, иқлим ўзгариши ва атроф-муҳит, болаларнинг йўллардаги хавфсизлиги, оиладаги зўравонлик ҳамда ўсмирларнинг руҳий саломатлиги масалаларига урғу берди.

U-Report сўровлари шуни кўрсатадики, қишлоқ жойларда респондентларнинг 70 фоизи, шаҳар ва вилоят марказларида яшовчи респондентларнинг 85 фоизи интернетдан бепул фойдаланиш имкониятига эга. Сенатдаги йиғилишда ёш иштирокчилар интернетдаги зарарли сайтларга блок қўйиш ҳамда интернетда болалар хавфсизлигини таъминлашга жиддий эътибор қаратишни сўраган.

Аввалроқ вояга етмаган шахсларга нисбатан жинсий зўравонлик содир этган шахсларнинг болалар билан ишлаши қатъиян ман этилиши хабар қилинган эди.