Жаҳон чемпионати олдидан яна бир йўқотиш: Равшан Элибоев жароҳат олди

Яқиндагина жароҳатидан тузалиб сафга қайтган Ўзбекистон футзал миллий терма жамоаси дарвозабони Равшан Элибоев Францияга қарши ўртоқлик учрашувида жароҳат олди. Бу ҳақда Ўзбекистон футбол ассоциацияси матбуот хизмати хабар берди.

“Текширув натижалари унинг бармоғи синганини ва маълум муддатга сафдан чиққанини кўрсатди. 

Афсуски, футзалчимиз яқинлашиб келаётган FIFA Футзал Жаҳон чемпионатини ўтказиб юбориши маълум бўлди.

Равшаннинг тезроқ соғайишини тилаб, уни қўллаб-қувватлашда давом этамиз”, дейилади матбуот хизмати хабарида.

Аввалроқ Даврон Чориев ҳам Жаҳон чемпионатини ўтказиб юбориши маълум бўлган эди. 

Маълумот учун, мусобақалар 14 сентябрдан 6 октябргача Тошкент, Андижон ва Бухоро вилоятларида бўлиб ўтади.