Pop va kantri usulidagi qo‘shiqlari bilan tanilgan amerikalik xonanda Teylor Svift nafaqat o‘z vatanida, balki butun dunyoda millionlab muxlislarga ega. Uning konsertlari hatto rivojlangan mamlakatlarda iqtisodiy vaziyatni o‘zgartirib yuborgan.
Qo‘shiqchi Ginnes rekordlar kitobiga tarixdagi eng daromadli konsert gastroli tashkilotchisi sifatida ham kirgan. 2023-yilda “Yil odami” unvoniga sazovor bo‘lgan xonanda san’at sohasidagi yangiliklardan tashqari ko‘chmas mulklarga bo‘lgan ishtiyoqi bilan ham ajralib turadi. Yaqinda u navbatdagi hashamatli uyni xarid qildi.
Binoning tashqi ko‘rinishi
Forbes nashrining eng badavlat milliarderlari reytingidan o‘rin olgan Teylor Sviftning mazkur uyi Atlantika okeani sohilida, Rod Aylendda joylashgan. Xonadon qirg‘oqqa yaqin hududda qurilganligi sababli o‘zining shaxsiy plyajiga ham ega.
Uyning o‘zi uch qavatdan iborat bo‘lib, dengiz sathidan ancha baland hududda joylashgan. Qasrdek hashamatli xonadon yuz yil avval qurilgan va unga “Baland soat” deb nom berilgan. Binoning tashqi tomoni yorqin bezaklar va murakkab me’moriy shakllardan holi bo‘lib, eksteryer sokin kulrang va oq ranglarda tuzilgan.
Interyer
Xonadonga kirib borsangiz, binoning tashqi tomoni uyning ichki qismidan tubdan farq qilishining guvohi bo‘lasiz. Uyning dizaynida ko‘tarinki kayfiyat baxsh etadigan yorqin ranglardan foydalanilgan. To‘q pushti rangda ishlangan mehmonxona shinam kamin, yog‘ochdan yasalgan stol-stullar hamda dekorativ gullardan iborat. Yumshoq mebellar ham devor ranglariga monand pushti rangda. Qo‘shni xonada ovqatlanish va dam olish zonasi bo‘lib, u yerda ham nafis ranglardan foydalanilgan, oshxonaning derazalari esa sohilga qaragan.
Xonanda Teylor Sviftning boshqa hududlarda o‘nga yaqin turli shakldagi ko‘chmas mulklari mavjud. Yulduzga tegishli xonadonlar ro‘yxatida Beverli Hillsdagi kottej va kvartira, Nyu York va Neshvilldagi apartamentlar, Tennesidagi katta hovli ham bor.
Izoh (0)