“Дарё”да Тошкентдаги прокуратура биносининг қурилиши тадбиркорга 190, қурувчиларга эса 160 млн сўм зарар келтирилаётгани хабар берилганди. Бош прокуратура ахборот хизмати раҳбари Ҳаёт Шамсутдиновнинг таҳририятга маълум қилишича, ҳолат назоратга олинган. Натижаси ҳақида қўшимча хабар қилинади.
Аниқланишича, Янгиҳаёт туман прокуратурасининг биноси қурилиши учун қурувчига 190 миллион сўмлик металл сотган тадбиркор Шероз Абдуқодиров пулини ололмай сарсон бўлмоқда. Шунингдек, бу бино қурилишини бошлаган қурувчи 33 нафар ёлланма ишчини ишлатиб, уларнинг 160 миллион сўмлик маошини ҳам бермай юрибди.
Туман прокуратураси биносини қураётган Музаффар исмли қурувчига қиймати 190 миллион сўм бўлган металл сотганман. Олди-сотди жараёни одатдагидек оғзаки бўлган. 2023 йилнинг декабрь ойида, 2024 йилнинг январь ойида пулимни беришларини ваъда қилишганди. Аммо ваъда бажарилмади. Мен эса пулимни ололмай сарсонман, деганди бу ҳақда “Дарё”га мурожаат қилган Шероз Абдуқодиров.
Тадбиркорнинг маълумот беришича, айни кунга келиб туман прокуратураси биносини қураётган қурувчи ишдан четлатилган.
Бино қурилиши бош пудратчи “Қорақалпоқ-барҳаёт” МЧЖ назоратида “Нур Собирофф” корхонаси томонидан олиб борилаётган эди. Лекин айни кунда қурилиш ишлари “Нур Собирофф” корхонасидан олиб қўйилган ва бош пудратчи томонидан давом эттирилмоқда, дейди тадбиркор.
“Дарё” журналистининг аниқлаштиришича, ушбу бино қурилишида иштирок этган 33 нафар ишчининг 160 миллион сўмлик маоши ҳам “уриб қолинган”.
2023 йилнинг ноябрь ойида шу бино қурилишида ишлай бошладик. Лекин Янги йилгача бир тийин ҳам беришмади. Байрамни ҳам пулсиз ўтказдик. Кўп жойга мурожаат қилганимиздан сўнг, 100 миллион сўм аванс беришди. Яна 160 миллион сўм пулимиз бор эди. Ўша пулни ололмадик. Қолиб кетди. Ҳалигача беришмади. Шоҳжаҳон ака 10 минг доллар бераман, қолганига рози бўласизлар, деганди. Лекин ўша пул ҳам берилмади, деганди ўзини Отабек деб таништирган қурувчи.
Изоҳ (0)