Тошкент шаҳри Янгиҳаёт туман прокуратурасининг янги биноси қурилиш буюмлари сотиш билан шуғулланувчи тадбиркор Шероз Абдуқодировга қимматга тушмоқда. Бино қурилиши учун 190 миллион сўм қийматидаги металлини сотган тадбиркор пулини ололмай сарсон бўлмоқда. Шунингдек, бу бино қурилиши 33 нафар ёлланма ишчининг 160 миллион сўмлик маошини ҳам “ютиб юборган”.
Туман прокуратураси биносини қураётган Музаффар исмли қурувчига қиймати 190 миллион сўм бўлган металл сотганман. Олди-сотди жараёни одатдагидек оғзаки бўлган. 2023 йилнинг декабрь ойида, 2024 йилнинг январь ойида пулимни беришларини ваъда қилишганди. Аммо ваъда бажарилмади. Мен эса пулимни ололмай сарсонман, дейди бу ҳақда “Дарё”га мурожаат қилган Шероз Абдуқодиров.
Тадбиркорнинг маълумот беришича, айни кунга келиб туман прокуратураси биносини қураётган қурувчи ишдан четлатилган.
Бино қурилиши бош пудратчи “Қорақалпоқ-барҳаёт” МЧЖ назоратида “Нур Собирофф” корхонаси томонидан олиб борилаётган эди. Лекин айни кунда қурилиш ишлари “Нур Собирофф” корхонасидан олиб қўйилган ва бош пудратчи томонидан давом эттирилмоқда, дейди тадбиркор.
“Дарё” журналисти билан суҳбатлашган Музаффар Ражабовнинг айтишича, унинг масъуллигидаги “Нур Собирофф” корхонаси бош пудратчи томонидан қурилиш ишларидан четлатилиб, ҳатто хизмат ҳақи ҳам тўлиқ тўланмаган. “Қорақалпоқ-барҳаёт” МЧЖ таъсисчиси эса “Нур Собирофф” корхонасига чала ишлари учун 1 миллиард 200 миллион сўм миқдоридаги маблағ ўтказиб берилганини айтмоқда.
Ортиқчаси билан тўладик. Қилинган ишларни ҳисоб қилганимизда аслида 800 миллион сўмлик иш бажарилгани маълум бўлди. Шунга қарамасдан, биз унга 1 миллиард 200 миллион сўм маблағ ўтказиб берганмиз. Аслида, биз эмас, улар бизнинг ҳаққимизни еган бўлиб чиқмоқда, дейди журналистнинг бу ҳақдаги саволига жавоб берган “Қорақалпоқ-барҳаёт” МЧЖнинг Шоҳжаҳон исмли таъсисчиси.
Масъул гапини исботлаш учун ҳужжат тақдим қилишини билдирди. Бироқ ҳужжатларда “Қорақалпоқ-барҳаёт” МЧЖ “Нур Собирофф” корхонасига қилинган ишлар учун 1 миллиард 27 миллион сўм миқдорида пул ўтказиб бергани маълум бўлди.
“Дарё” журналистининг аниқлаштиришича, ушбу бино қурилишида иштирок этган 33 нафар ишчининг 160 миллион сўмлик маоши ҳам “уриб қолинган”.
2023 йилнинг ноябрь ойида шу бино қурилишида ишлай бошладик. Лекин Янги йилгача бир тийин ҳам беришмади. Байрамни ҳам пулсиз ўтказдик. Кўп жойга мурожаат қилганимиздан сўнг, 100 миллион сўм аванс беришди. Яна 160 миллион сўм пулимиз бор эди. Ўша пулни ололмадик. Қолиб кетди. Ҳалигача беришмади. Шоҳжаҳон ака 10 минг доллар бераман, қолганига рози бўласизлар, деганди. Лекин ўша пул ҳам берилмади, дейди ўзини Отабек деб таништирган қурувчи.
Тошкент шаҳар ҳокимлиги “Ягона буюртмачи хизмати” инжиниринг компанияси бўлиб, объектнинг дастлабки қиймати сифатида республика бюджетидан 14 миллиард 493 миллион сўм ажратилиши белгиланган. Объектнинг иқтисод қилингандан сўнгги қиймати 12 миллиард 356 миллион сўмни ташкил қилган. Айни пайтда бу иш учун 9 миллиард 482 миллион сўм молиялаштирилган бўлиб, амалда 9 миллиард сўмлик иш бажарилган.
Янгиҳаёт тумани прокурори ўринбосари Азиз исмли суҳбатдош бино қурилиши билан боғлиқ ҳеч қандай муаммо йўқлигини, ҳеч кимнинг ҳаққига хиёнат қилинмаётганини айтиб, Шоҳжаҳон исмли қурувчига “Дарё”га етарлича ахборотлар бериши кераклигини уқтирди. Қурувчи журналистга фақатгина “Қорақалпоқ-барҳаёт” МЧЖ ҳисобидан “Нур Собирофф” корхонасига қанча маблағ ўтказилгани ҳақидаги маълумотнигина бериш билан чекланди.
“Дарё” мазкур масала юзасидан масъулларнинг қўшимча изоҳи, далилларини эълон қилишга тайёрлигини маълум қилади.
Изоҳ (0)