Қозоғистондаги Оқўрда қароргоҳида 8 август куни Шавкат Мирзиёевни расмий кутиб олиш маросими бўлиб ўтди.
Президент матбуот хизматининг маълум қилишича, олий мартабали меҳмон шарафига фахрий қоровул саф тортди. Ўзбекистон ва Қозоғистон давлат мадҳиялари янгради. Икки мамлакат етакчилари фахрий қоровул сафи олдидан ўтдилар. Биргаликда суратга тушилди.
Сўнг давлат раҳбарларининг тор доирадаги музокаралари бошланди. Томонлар Ўзбекистон билан Қозоғистон ўртасидаги стратегик шериклик ва иттифоқчилик муносабатларини янада ривожлантириш ва чуқурлаштиришнинг долзарб масалаларини муҳокама қилди.
Оқўрдада расмий кутиб олиш маросимидан лавҳалар
-8OU4aXIN.jpg)
-232cyGIG.jpg)
-dvnbFP5f.jpg)
Шавкат Мирзиёев 7 август куни давлат ташрифи билан Қозоғистонга келди. Остона халқаро аэропортида давлат раҳбарини Қозоғистон Республикаси президенти Қосим-Жўмарт Тўқаев кутиб олди.
Ташриф дастурига мувофиқ, икки мамлакат раҳбарларининг музокаралари ва президентлар раислигида Олий давлатлараро кенгашнинг биринчи йиғилиши ўтказилиши режалаштирилган. Ўзбекистон билан Қозоғистон ўртасидаги стратегик шериклик ва иттифоқчилик муносабатларини янада чуқурлаштириш масалалари, халқаро ва минтақавий кун тартибининг долзарб жиҳатлари кўриб чиқилади.
Давлат ташрифи арафасида икки мамлакат ишбилармон доираларининг 300 дан ортиқ вакиллар иштирокида қўшма бизнес-форум бўлиб ўтди.
Шавкат Мирзиёев 2024 йилнинг 3—4 июль кунлари амалий ташриф билан Остона шаҳрида бўлганди. Давлат раҳбари Шанхай ҳамкорлик ташкилоти давлат раҳбарлари кенгашининг навбатдаги мажлиси ва “ШҲТ плюс” форматидаги учрашувда иштирок этди. Давлат ташрифи билан эса Қозоғистонга сўнгги марта 2021 йилнинг декабрида борганди.
Изоҳ (0)