Ostonada Qozog‘iston—O‘zbekiston biznes-forumi bo‘lib o‘tdi (foto)

Qozog‘istonning Ostona shahrida 7-avgust kuni Shavkat Mirziyoyevning davlat tashrifi arafasida ikki mamlakat ishbilarmon doiralarining 300 dan ortiq vakillar ishtirokida qo‘shma biznes-forum bo‘lib o‘tdi.

Unga Qozog‘iston bosh vaziri o‘rinbosari Serik Jumangarin va O‘zbekiston bosh vaziri o‘rinbosari Jamshid Xo‘jayev hamraislik qildi. Forumda vazirliklar, idoralar, tarmoq birlashmalari va hududiy boshqarmalar rahbarlari ham ishtirok etdi.

Tadbirda so‘zga chiqqan Jamshid Xo‘jayev tarixan shakllangan yaxshi qo‘shnichilik, xalqlar o‘rtasidagi do‘stlik, o‘zaro manfaatli sheriklik va ittifoqchilik ruhini, shuningdek, ikki davlat rahbarlari o‘rtasidagi o‘zaro hamjihatlikning yuksak darajasi tufayli erishilgan hamkorlikning barcha yo‘nalishlarida salmoqli natijalarga erishayotganini alohida ta’kidladi.

Xususan, o‘zaro tovar ayirboshlash hajmi 2023-yil yakuniga ko‘ra 4,4 milliard dollardan oshgani qayd etildi. Savdo aylanmasining zamonaviy tarkibiga transport vositalari va ehtiyot qismlar, mexanik asbob-uskunalar, oziq-ovqat mahsulotlari, to‘qimachilik mahsulotlari, qora metallar va ulardan tayyorlangan mahsulotlar, mineral yoqilg‘i va elektr energiyasi, rudalar va kimyo mahsulotlari kiradi.

Bunda ikki mamlakat iqtisodiyotining ulkan salohiyati tovar ayirboshlash hajmini sezilarli darajada oshirish imkonini beradi.

Bu yo‘nalishda savdo tartib-qoidalarini soddalashtirish, mavjud to‘siqlarni bartaraf etish va o‘zaro savdoni qo‘llab-quvvatlash, shuningdek, savdo infratuzilmasini yaxshilash va ikki mamlakat ishbilarmon doiralari o‘rtasidagi o‘zaro hamkorlikni rivojlantirish bo‘yicha hamkorlikdagi ishlar davom ettiriladi.

Bu chora-tadbirlarning barchasi O‘zbekiston va Qozog‘iston o‘rtasidagi tovar ayirboshlash hajmini 2030-yilgacha 10 milliard dollarga yetkazish bo‘yicha ishlab chiqilgan dasturda o‘z aksini topgan.

Qo‘shma loyihalar portfeli avtomobilsozlik, elektrotexnika, farmatsevtika, kimyo sanoati, logistika va development kabi sohalarni o‘z ichiga oladi. Biroq bu ro‘yxat ikki mamlakat iqtisodiyoti va sanoatining salohiyatini to‘liq ochib bermagani bois oliy darajadagi tashrif arafasida umumiy qiymati 5 milliard dollarga teng yangi kelishuvlar paketi shakllantirildi.

Jumladan, Qambarota GES-1 loyihasini amalga oshirishda ishtirok etish, uchinchi davlatlarga eksport qilishni tashkil etgan holda Qozog‘istonda lift, elektr energiyasi va gaz hisoblagichlarini ishlab chiqarish, Qo‘stanayda Chevrolet avtomobillari uchun ehtiyot qismlar va butlovchi qismlarni ishlab chiqarishni mahalliylashtirish, Turkiston viloyatida paxta-to‘qimachilik klasterini yaratish, Olmaota va Atirau viloyatida poyabzal ishlab chiqarish, Tarozda metallurgiya zavodini qurish, Jizzaxda bazalt tolasi ishlab chiqarish, O‘zbekistonda farmatsevtika mahsulotlari ishlab chiqaruvchi korxona qurilishi va boshqalar.

Turar joy majmualari va infratuzilma obyektlarini qurish bo‘yicha loyihalar muvaffaqiyatli amalga oshirilayotgani alohida ta’kidlanib, Xalqaro sanoat kooperatsiyasi markazining ahamiyati, uning hududida keramik plitalar, profillar, metall konstruksiyalar va to‘qimachilik mahsulotlari ishlab chiqaradigan yangi korxonalarni joylashtirish rejalashtirilgani qayd etib o‘tildi.

Hamkorlikni rivojlantirishning ustuvor yo‘nalishlari sifatida logistika zanjirlarini takomillashtirish va tovar ayirboshlash hajmini oshirishga xizmat qiladigan loyihalar — qishloq xo‘jaligi mahsulotlarining o‘zaro savdosi hajmini oshirish, meva-sabzavot yetishtirish va qayta ishlash, infratuzilmani yaxshilash, multimodal yo‘laklarni rivojlantirish bo‘yicha loyihalar ko‘rsatib o‘tildi.

Ikki mamlakat hududlari o‘rtasidagi o‘zaro hamkorlikni kuchaytirish muhimligi ta’kidlanib, buning uchun joriy yil oxirigacha Samarqand shahrida o‘zaro tashriflar jadvalini tayyorlash va hududlar forumini o‘tkazish taklif etildi.

Qozog‘iston bosh vaziri o‘rinbosari Serik Jumangarin yangi qo‘shma tashabbuslarni har tomonlama qo‘llab-quvvatlash, o‘zaro manfaatli loyihalarni amalga oshirish uchun imtiyozli shart-sharoitlar yaratish istagini qayd etib, qozoq biznesini noyob imkoniyatlardan unumli foydalanishga va o‘zbekistonlik hamkasblar bilan faolroq hamkorlik qilishga, yangi qo‘shma korxonalar ochish va o‘zaro manfaatli savdo aloqalarini o‘rnatishga chaqirdi.

Forum doirasida B2B va G2B formatlarida muzokaralar olib borilib, ikki mamlakat tadbirkorlari kelgusidagi hamkorlik istiqbollarini atroflicha muhokama qilishdi va sheriklikning amaliy jihatlarini muhokama qildi.

Qo‘shma biznes-forum yakunida energetika, geologiya, avtomobilsozlik, elektrotexnika va yengil sanoat, shuningdek, qurilish materiallari va farmatsevtika mahsulotlari ishlab chiqarishda hamkorlik salohiyatini ochishga qaratilgan investitsiya bitimlari va savdo shartnomalari imzolandi.

Qozog‘iston—O‘zbekiston biznes-forumidan lavhalar

Eslatib o‘tamiz, Shavkat Mirziyoyev Qozog‘iston prezidenti Qosim-Jo‘mart To‘qayevning taklifiga binoan 7–9-avgust kunlari davlat tashrifi bilan ushbu mamlakatda bo‘ladi. 

Tashrif dasturiga muvofiq, ikki mamlakat rahbarlarining muzokaralari va prezidentlar raisligida Oliy davlatlararo kengashning birinchi yig‘ilishi o‘tkazilishi rejalashtirilgan. O‘zbekiston bilan Qozog‘iston o‘rtasidagi strategik sheriklik va ittifoqchilik munosabatlarini yanada chuqurlashtirish masalalari, xalqaro va mintaqaviy kun tartibining dolzarb jihatlari ko‘rib chiqiladi.

Asosiy eʼtibor savdo, sanoat kooperatsiyasi, transport va logistika, energetika, qishloq va suv xo‘jaligi hamda boshqa ustuvor yo‘nalishlardagi amaliy hamkorlikni kengaytirish masalalariga qaratiladi.

Ikki tomonlama munosabatlarni mustahkamlashga qaratilgan hujjatlar to‘plamini qabul qilish kutilmoqda.