АҚШ ҳукумати очарчилик чангалида қолган Конго Демократик Республикаси аҳолиси учун 414 миллион доллар ҳажмидаги гуманитар ёрдам пакети ажратади. Бу ҳақда БМТ Гуманитар ёрдам маркази тарқатган хабарга асосланиб, Al Arabiya нашри хабар берди.
Манбада айтилишича, бугунги кунда КДР ҳудудида 25 миллиондан ортиқ фуқаро очарчилик шароитида яшамоқда. Бу эса мамлакат аҳолисининг қарийб тўртдан бири дегани.
Мамлакатнинг шарқий қисмларида юз берган исёнчилик ҳаракатлари ҳамда Руанда билан чегара ҳудудида юз берган тўқнашувлар оқибатида миллионлаб фуқаролар қочоққа айланган. Тинч аҳоли деҳқончилик ҳудудлари ва турар жойларини ташлаб кетиши оқибатида очарчилик муаммоси кескинлашган.
АҚШнинг БМТ озиқ-овқат ва қишлоқ хўжалиги агентлигидаги элчиси Жеффри Прескоттнинг айтишича, ажратиладиган гуманитар ёрдамнинг катта қисми Бирлашган Миллатлар Ташкилоти агентликлари, шошилинч озиқ-овқат ёрдами дастури, соғлиқни сақлаш ва овқатланиш, бошпана, сув, санитария ва гигиена бўйича ёрдам кўрсатадиган гуруҳларга йўналтирилади. Маблағлар фақатгина оч аҳолини таъминлаш учун эмас, балки ижтимоий инқирозни кучайтираётган сабабларни бартараф қилиш учун ҳам сарфланади.
Манбада айтилишича, ўтган йилнинг октябрь ойидан бери АҚШ ҳукумати Конго Демократик Республикаси учун ажратган маблағлар жами 838 миллион долларни ташкил этган. Ижтимоий ёрдам агентликларининг саъй-ҳаракатларига қарамай, улкан сонли оч аҳоли ёрдам маблағларини ютиб юбормоқда. Ижтимоий инқироз эса тобора кучаймоқда.
Конго армияси 2022 йилдан бери М23 исёнчиларига қарши курашиб келмоқда. Мамлакат шарқида кечган жанглар оқибатида сўнгги 6 ойда 1,7 миллиондан ортиқ одам ўз уйларини ташлаб кетган. Кўплаб можаролар туфайли кўчирилган конголикларнинг умумий сони эса рекорд даражадаги 7,2 миллионга нафарга етган.
Бирлашган Миллатлар Ташкилоти 2024 йилда дунё мамлакатларини КДР учун умумий 2,6 миллиард доллар ажратишга чақирган. Ижтимоий муаммолар кучайиб бораётгани, мамлакатда бир миллиондан ортиқ болалар тўйиб овқатланмаслик оқибатида касалликларга дучор бўлиш хавфи остида экани огоҳлантирилган.
Конго Демократик Республикаси шарқида ҳозирда маймунчечак эпидемияси давом этаётгани хабар берилган. Ушбу касаллик билан оғриганлар сони 27 минг нафардан ошган. Ҳалок бўлган фуқаролар сони эса 1100 нафарга етган. АҚШ ушбу эпидемияга қарши кураш доирасида пойтахт Киншасадаги тиббиёт муассасаларига 50 минг қути вакцина ажратган.
Изоҳ (0)