Qarshi shahri hokimi, prokuror va IIB boshlig‘i tadbirkor ayolga tegishli binoni sud qarorisiz buzdirdi. Biznes ombudsman mansabdorlarga chora ko‘rishni so‘ragan

Qarshi shahri hokimi Normo‘min Xolboyev boshchiligidagi “uchlik” tadbirkor ayolga tegishli binoni sud qarorisiz buzdirdi. Biznes ombudsman bu bo‘yicha viloyat prokuraturasiga murojaat qilib, mansabdorlar noqonuniy xatti-harakati uchun javob berishi kerakligini so‘radi. “Daryo” mazkur holatni o‘rgandi. 

“Otchopar” mahallasidagi qarovsiz yer auksionga qo‘yilgach, 5 ta lotni yutib olib, maishiy xizmat ko‘rsatish shoxobchasi tashkil qilgandik. Tadbirkorlikka bemalol, ikkilanmasdan pul tikkanimiz prezidentimizning tadbirkorlarga yaratib berayotgan imkoniyatlari sabab edi. Lekin afsuski, Qarshi shahri hokimi, prokurori va IIB boshlig‘i o‘zboshimchalik bilan men qurgan binoni buzib tashladi, — deydi tadbirkor Nigora Hamidova. 

Suhbatdoshning aytishicha, u maishiy xizmat ko‘rsatish shoxobchasini barpo etish uchun 750 million so‘m mablag‘ sarflagan. 

“Yerni auksionda sotib olgach, yengil tipda bino qurishdan avval loyiha-smetasini qildik va bino 750 million so‘mga baholandi. Shundan so‘ng, qurilish ishlarini boshlab, qisqa fursatda tugatdik. Faoliyat boshlashimizga bir hafta qolganda Qarshi shahridagi rahbarlar zo‘ravonlik bilan buzib tashlashdi”, deydi u. 

Nigora Hamidovaning “Daryo”ga taqdim qilgan hujjatlariga ko‘ra, u yerni auksion savdodan sotib olayotgan paytda faoliyati ko‘chma savdo orqali amalga oshirilishi belgilangan bo‘lib, Qarshi shahar davlat soliq inspeksiyasi talablari qo‘yilgan. Biroq tadbirkor ko‘chma savdo qilish talabini buzgan. 

“Qurilishimiz bitib, faoliyat yuritishimizga bir hafta qolganda arxitektura, kadastr, hokimiyat va prokuraturadan vakillar kelib, bu yerda qurilish qilmasligim kerakligi, bu binoni buzishim lozimligini tushuntirdi. Shundan so‘ng, men bu ishni qonuniy hal qilishimiz kerakligini, sudga berishsa, noqonuniy ish qilgan bo‘lsam, javob berishimni aytdim. Keyin dalolatnoma tuzishdi va mazkur binoni 15 kun ichida ixtiyoriy buzib tashlashim kerakligini, yo‘qsa sudga berishlari mumkinligi, sud qarori bilan buzilishini aytib, ogohlantirishdi. O‘shanda men haqligim uchun qo‘rqmadim va sudga berishlari mumkinligini bildirdim. Boisi, yer meniki edi, uni auksiondan sotib olgandim. Ammo 15 kunlik muddat o‘tmasdan, 15-fevral kuni Qarshi shahri hokimi, prokurori va IIB boshlig‘i hududga kelib, hech qanday hujjatlarsiz, sud qarorisiz binoni buzishdi”, deydi tadbirkor. 

Nigora Hamidovaning qo‘shimcha qilishcha, buzish jarayonlari shaxsan Qarshi shahri hokimi Normo‘min Xolboyev boshchiligidagi shahar prokurori, shahar IIB boshlig‘i ishtirokida Obodonlashtirish boshqarmasi xodimlari tomonidan amalga oshirilgan.

“O‘sha kuni syomka qilganim uchun telefonimni tortib olib, ichidagi videolarni o‘chirishdi. Atrofdagilarga tasvirga olishga ruxsat berilmadi. IIB boshlig‘i esa e’tiroz bildirganimga javoban, kimgadir topshiriq berib, meni qamab qo‘yishni buyurdi. Shahar prokuroriga qonuniy ish qilinishini nazoratga oling, sud qarorisiz binoni buzishga haqqingiz yo‘q deb tushuntirsam-da, meni hech kim eshitmadi. Barcha mol-mulkim, 750 million so‘mlik qurilish materiallarim yo‘q bo‘ldi”, deydi shikoyatchi tadbirkor. 

Tadbirkorning aytishicha, u xatti-harakatini qonuniy deb bilgan. 

“Agar ishim noqonuniy bo‘lganda, yerni noqonuniy egallab olib, qurilish qilganimda shuncha ogohlantirishdan so‘ng, o‘zim bilib, aybimni tan olib, buzib olardim. Va qilingan xarajatimga kuymaslik uchun ham o‘zim buzish ishlarini yakunlardim. Hozir mol-mulkim talon-toroj qilindi”, deydi murojaatchi. 

Tadbirkor u qurgan bino noqonuniy deb buzilganini, ammo bino atrofi o‘ralgan devor esa hamon buzilmaganini aytmoqda.

“Hokim, prokuror va IIB boshlig‘i buzish ishlarini olib borgach, hozirda yer o‘sha eski holatiga qaytdi. Tashlandiq, tikan bosgan va qarovsiz holatiga. Men qurgan bino noto‘g‘ri ekan, nega bino atrofi o‘ralgan devor hamon buzilmagan? Men qurgan bino ularga xalal beradi-yu, qabristonni yopib turuvchi, tashlandiq joylarni yashirib turuvchi devor kerakmi? Men shu yerda faoliyat yuritib, atrofni yashil makonga aylantirsam, tartibli savdo qilsam nimasi yomon? Hozir shifoxonaga kirish eshigining tagida noqonuniy yoyma savdo avjiga chiqqan. Shahar mas’ullariga shu kerakmidi?”, deydi tadbirkor.

Qarshi shahar hokimligi axborot xizmatining “Daryo”ga bildirishicha, bu qurilish fuqaro tomonidan o‘zboshimchalik bilan noqonuniy qurilgan. 

“Tadbirkorga kadastr agentligi tomonidan bino qurilishidan oldin ham ogohlantirish berilgan. Qarshi shahar kadastr agentligi tomonidan jarima ham qilingan. Poydevor buzdirilgan, lekin tadbirkor qonunni qasddan buzib yana qurilishni davom ettirgan”, deydi hokim harakatiga izoh bergan Qarshi shahar hokimligi axborot xizmati rahbari. 

Tadbirkor Nigora Hamidova endilikda tadbirkor sifatida Qarshi shahrida faoliyat yuritib, biror bir sohaga 100 ming so‘m investitsiya tikishga ham qo‘rqib qolganini, imkoni bo‘lsa xorijga chiqib, tadbirkorligini davom ettirmoqchiligini bayon qilmoqda.

Tadbirkor huquqini himoya qilayotgan advokat Oybek Rahimovning ma’lumot berishicha, Iqtisodiyot va moliya vazirligi huzuridagi kadastr agentligining Qarshi shahar bo‘limi boshlig‘i sudga taqdimnoma kiritib, 2024-yil 14-fevraldagi bayonnomaga ko‘ra, Nigora Hamidova noqonuniy qurilish olib borgan deya, uni ma’muriy javobgarlikka tortishni so‘raydi. Biroq, sud bu taqdimnomani qanoatlantirishni rad etadi. Mazkur ish bo‘yicha sud davom etmoqda.

“Daryo” mavzuga qaytadi.