ҲАМАС раҳбари Қатарда дафн этилади

Фаластиннинг ҲАМАС ҳаракати сиёсий бюроси раҳбари Исмоил Ҳания Эрондаги видолашув маросимидан сўнг 2 август куни Қатарда дафн этилади.

Аввалроқ Фаластиннинг ҲАМАС ҳаракати Исроилнинг Эрон пойтахтидаги қароргоҳига уюштирган зарбаси натижасида Ҳания ҳалок бўлганини хабар қилган эди.

Исмоил Ҳания билан расмий видолашув маросими 1 август куни Теҳронда бўлиб ўтади. Шундан сўнг жасад Қатар пойтахти Доҳага етказилгач, Лусайл шаҳрида 2 август куни дафн этилади, дейилади ҲАМАС матбуоти баёнотида.

Доҳадаги видолашув маросимида, ҲАМАСнинг аниқлик киритишича, араб ва ислом етакчилари, шунингдек, Фаластин фракциялари аъзолари иштирок этади.

Эроннинг янги президенти Масъуд Пезешкиён ҲАМАС сиёсий етакчиси ўлдирилишини қоралаб, Эрон “ўзининг ҳудудий яхлитлигини ҳимоя қилишини” айтган. Теҳронда уч кунлик мотам эълон қилинди.

Шунингдек, у “террорчи босқинчилар ўзларининг қўрқоқлик ҳаракатларидан пушаймон бўлишларини” билдирган. Эрон олий раҳнамоси Али Хоманаий эса Ҳаниянинг ўлими учун Исроилга қарши “кескин жазо” Теҳроннинг бурчи эканини таъкидлаган.

Шаҳид Ҳания узоқ йиллар адолатли кураш майдонида ўзининг қимматли жонини ўз қўлига олиб, шаҳидликка тайёр бўлиб, бу йўлда фарзандларини, халқини қурбон қилди. У Аллоҳ йўлида шаҳид бўлиб, Аллоҳнинг бандаларини қутқаришдан қўрқмади, лекин Ислом республикаси ҳудудида содир бўлган воқеада унинг қони учун қасос олишни ўз бурчимиз деб биламиз, деди у.