Исроилнинг Ғазога уюштирган ҳаво ҳужуми натижасида ҲАМАС ҳаракати раҳбари Исмоил Ҳаниянинг уч ўғли ҳалок бўлди. Исроил мудофаа кучлари бу маълумотни тасдиқлади, дея Al Jazeera хабар берди.
Маълум бўлишича, Ғазо ғарбидаги қочқинлар лагерига уюштирилган зарбада Ҳаниянинг уч ўғли — Ҳазем, Амир ва Муҳаммад Исмоил ва икки набираси ҳам ҳалок бўлган.
Исроил ҳарбий-ҳаво кучлари авиацияси Ғазо марказида террорчилик фаолиятини амалга ошираётган ҲАМАСнинг учта жангарисига зарба берди, — дейилади Исроил ҳарбийлари баёнотида.
Булар Ҳания оиласининг уруш пайтида ҳалок бўлган биринчи аъзолари эмас: февралда яна бир ўғли, октябрда унинг укаси ва жияни, ноябрда эса набираси ҳалок бўлгани хабар қилинган эди. Ҳания ўз фарзандлари ва набираларини “шаҳидлар” деб атаган ва яқинларининг ўлими давом этаётган сулҳ музокараларидаги ҲАМАСнинг позициясини ўзгартирмаслигини қўшимча қилган.
Бизнинг талабларимиз аниқ, биз ён бермаймиз. Агар душман музокаралар ўртасида ўғилларимга ҳужум қилиш позициямизни ўзгартиришга ундайди, деб ўйласа, адашади, —деди Ҳания Al Jazeera билан суҳбатда.
ҲАМАС доимий ўт очишни тўхтатиш, Исроил қўшинларини тўлиқ олиб чиқиш ва кўчирилган фаластинликларни Ғазо шимолига қайтариш ҳақидаги дастлабки талабларига содиқ қолмоқда. Исроил бош вазири Биньямин Нетаньяхунинг таъкидлашича, Исроил гуруҳ йўқ қилинмагунча ва барча исроиллик гаровга олинганлар озод этилмагунча курашни давом эттиради.
Аввалроқ Исроил келгусидаги операцияларга тайёргарлик кўриш учун ўз қўшинларини Ғазо жанубидан олиб чиққанини айтган, бироқ анклав бўйлаб вақти-вақти билан ҳарбий амалиётлар давом этмоқда.
Изоҳ (0)