Покистонда икки қабила ўртасида юзага келган низо оқибатида камида 30 нафар фуқаро ҳалок бўлди. Бу ҳақда Arab News нашри хабар берди.
Манбада айтилишича, воқеа Покистон шимоли-ғарбидаги Хайбер-Пахтунхва вилоятида рўй берган. Куррам туманида икки қабиланинг мулкка эгалик қилиш борасидаги келишмовчилиги урушга айланиб кетган.
Вилоят маъмурлари қабилавий низода 30 киши ҳалок бўлганини маълум қилган. Жароҳатланиб касалхонага ётқизилганлар сони эса 158 нафарга етган.
Мулк масаласидан ташқари диний эътиқоддаги фарқ ҳам кескинликни кучайтириб юборган. Исломнинг икки турли оқими вакиллари бўлган қабила аъзолари бир-бирларини шаккокликда айблаб, қонли ҳужумлар уюштирган.
Хабарда айтилишича, икки қабила ўртасидаги низо аслида 2007 йилда юзага келган. Тўрт йил давом этган қонли қабилавий уруш 2011 йилда қабила оқсоқоллари жирғаси (қабилавий кенгаш) фатвоси билан тўхтатилган.
2024 йилда қайта юзага келган кескинлик аввалгисидан анча кенгроқ бўлган. Ўнлаб қишлоқлар аҳолиси ваҳима туфайли ҳудудларини вақтинчалик ташлаб кетган. Куррам тумани марказида отишмалар рўй берган.
Ҳукумат Куррам тумани ва унинг маркази Парачинар шаҳрида тўқнашувларни тўхтатиш учун йўлларни ёпиб қўйган. Бунинг оқибатида эса кўплаб аҳоли пунктлари ва қишлоқларда озиқ-овқат ва дори-дармонлар танқислиги кузатилган.
Бош вазир Шаҳбаз Шарифнинг аввалги маъмурияти даврида хориждаги покистонликлар бўйича федерал вазир бўлиб ишлаган минтақа сиёсатчиси Сажид Ҳусайн Турининг айтишича, фуқаролик ва хавфсизлик амалдорлари тезкор хатти-ҳаракатлар амалга ошириб, қабила бошлиқларини учраштиришга ва вақтинчалик сулҳ имзоланишига эришган. Эндиликда эса расмийлар бу сулҳ келишувини мустаҳкамлаш ва барқарорликни таъминлашга диққат-эътибор қаратган.
“Бизнинг устувор вазифамиз биринчи навбатда ўт очишни тўхтатиш бўйича воситачилик қилиш эди. Баҳсли ер ва мулк масаласини эса оқсоқоллар жирғаси ҳал қилади”, дейилган Покистон расмийлари хабарида.
Изоҳ (0)