Олександр Усик фаолиятини якунлаши мумкинлигига ишора қилди

37 ёшли украиналик боксчи, оғир вазнда жаҳон чемпиони Олександр Усик онаси ундан боксчилик фаолиятини якунлашини сўраётганини маълум қилди.

“Тайсон Фьюрига қарши жангдаги ғалабадан сўнг онам ҳамма нарсага эришганимни, энди фаолиятимни якунлашим мумкинлигини айтди. Лекин мен шартномам борлиги, унда реванш банди ҳам киритилганини тушунтирдим. Онам инглизча тушунмайди, шунинг учун бемалол айтишим мумкин: жанг қилишда давом этаман.

Боксни севаман. Ҳали кучим борлигини ҳис қиляпман. Бокс — менинг ҳаётим”, — дейди Усик.

Эслатиб ўтамиз, 19 май куни Усик Фьюрини очколар ҳисобида мағлуб этиб, мутлақ жаҳон чемпионига айланганди.

Ушбу жангдан сўнг Олександр Усик барча 5 камарга эгалик қилиш билан бир қаторда, мутлақ чемпионга айланди. Июнь ойида эса украиналик боксчи ўз ихтиёрига кўра IBF камаридан воз кечди. Олександр 2021 йил 21-сентябрьда Энтони Жошуани мағлуб этиб, IBF йўналиши бўйича жаҳон чемпиони бўлган эди.