Ёзнинг иссиқ кунларида турли чўмилиш ҳавзалари ва бассейнларга ташриф буюрадиган ёш-у қарилар сони ортади. Аммо ҳаво ҳарорати ва ҳовуздаги одамлар сони қанчалик юқори бўлса, турли касалликлар юқтириб олиш хавфи шунчалик ошади. Чунки иссиқ ҳаво ва сув орқали одам терисидаги турли бактерия ва инфекциялар бошқаларга ўтиши мумкин.
Албатта бассейнлардаги автоматик равишда хлорлаш тизими ва дезинфекциялаш воситалари бактериялар билан яхши курашади, лекин шундай вируслар борки, улар курашувчан ва хлорга чидамлидир. Қуйида ана шундай касалликларни кўриб чиқамиз.
Диарея
Халқ орасида ич оғриғи, ич кетиши номлари билан аталадиган диарея касаллиги ичак йўлларининг функсионал бузилиши ҳисобланиб, ичакларни тез-тез бўшатиш ва ичнинг суюқ ҳолатда келиши билан кечади. Диарея билан катталар ҳам, болалар ҳам касалланиши мумкин. Агар ич кетиш билан оғриган одам ҳовузда бўлганида ўзини назорат қила олмаса, миллионлаб микроблар бир зумда сувга тушади ва атрофга тарқалади.
Афсуски, гигиена қоидаларига риоя қилмайдиган шахслар ҳам учраб туради. Диарея хуружи тугагандан сўнг, ювиниш ўрнига шунчаки ҳожатхона қоғозидан фойдаланадиганларда зарарли бактериялар сақланиб қолади. Бундай ҳолатда микроблар оз миқдорда бўлса ҳам, сувга тушади.
Қулоқ канали инфекцияси
Ташқи отит — қулоқ ташқи каналининг яллиғланиши бўлиб, касаллик тўғридан-тўғри эшитиш каналида содир бўлади. У қулоқларни нотўғри тозалаш ёки тоза бўлмаган ҳавзаларда чўмилиш орқали ривожланади.
Аслида қулоқлар ичидаги табиий ажралма — қулоқ шираси ҳимоя вазифасини бажаради. Аммо бассейн суви таркибидаги хлор уни бундай хусусиятдан маҳрум қилади. Натижада қулоқ ташқи канали олтин стафиллокок ёки кўк йиринг таёқчаси каби барча турдаги зарарли микроорганизмларга йўл очади.
Тери ва шиллиқ пардаларнинг қизариб, қичишиши
Аслида бассейндаги хлор ҳеч қандай ҳидга эмас. Ҳовузда чўмилаётганда чиққан хлор ҳиси сувдаги тери, кирлар ва сийдик билан реакцияга киришгандан ҳосил бўлади ва газга айланади. Улар хлорамин деб аталади ва терида қизариш, ачишиш, қичишиш, турли тошмалар, бурун шиллиқ қаватининг шишиши, йўтал, конюнктивит ва ринитга олиб келиши мумкин.
Шунинг учун сувга тушишдан аввал ва кейин душ қабул қилиш муҳимдир.
Фолликулит — иссиқ ҳаммом тошмаси
Бундай касаллик етарли даражада хлорланмаган иссиқ ванна ва жакузилар қабул қилгандан ривожланади, чунки хлор иссиқ сувда тезроқ парчаланади, бу терини безовта қилувчи Псеудомонас аэругиноса бактерияларининг омон қолишига имкон беради.
Фолликулит белгилари одатда чўмилгандан кейин бир неча соат ичида пайдо бўлади, лекин баъзи ҳолларда тошмалар бир неча кундан сўнг чиқиши мумкин.
Легионеллёз
Легионерлар касаллиги бассейндан юқиши мумкин бўлган энг жиддий ва пневмониянинг оғир формасидир. Уни Легионелла пнеумопҳила бактерияси қўзғатади ҳамда нафас йўлларига инфекцияланган сув кирганда пайдо бўлади. Ўпкага микроорганизмлар кириши билан инфекция яшин тезлигида танада тарқала бошлайди.
Хлор ва бром билан зарарсизлантирилган сувда Легионелла бактерияси тезда нобуд бўлади, аммо ҳовуз эгаси хавфсизлик қоидаларига амал қилмаса, кўплаб инсонларга зарар етиши мумкин.
Легионер касаллигининг белгилари: нафас қисилиши, йўтал, титроқ, кўкрак қафасидаги оғриқлар ва ҳарорат 40 ° C ёки ундан юқори бўлиши. Касалликнинг бундай белгилари пайдо бўлса, дарҳол тез ёрдам чақириш зарур. Кўпчилик беморлар фақатгина касалхонада даволанади.
Ҳовузда юқадиган касалликлардан ҳимояланиш усуллари
- Аввало сув ютмаслик;
- Яқинда касалликдан тузалган бўлсангиз, бассейнга бормаслик;
- Иссиқ ҳовузда чўмилмаслик;
- Қулоқларингизга сув кирмаслиги учун қулоқ тиқинларидан фойдаланиш ва қалпоқ кийиш;
- Тананинг бирор жойи кесилган ёки тирналган бўлса ҳам бассейнларга бормаслик;
- Ҳовуз суви қанчалик тез-тез алмаштирилиши суриштириш;
- Душда ёки бассейн яқинида ялангоёқ юрмаслик;
- Чўмилишдан аввал ва кейин совун билан душ қабул қилиш.
Изоҳ (0)