Шимолий Африкадаги Ливия ва Тунис ҳукуматлари миграция инқирозига қарши курашда Европа раҳбариятидан ёрдам сўради. Бу ҳақда Al Jazeera нашри хабар берди.
Манбада айтилишича, Тунис ва Ливия ҳукуматлари қочқинлар ва муҳожирлар оқимини тўхтатиш бўйича халқаро Триполи конференциясида қатнашган. Унда Ўрта Ер денгизи жанубидаги муаммоли вазиятни бартараф этишда амалий қадамлар ташлаш сўралган.
Триполи конференциясида Африка ва Европанинг 28 давлати вакиллари қатнашган. Унда ҳукуматлар вакиллари тартибсиз миграцияни бартараф этиш борасида режа ишлаб чиқишга келишиб олишган.
Ҳар йили Шимолий Африкадан, асосан, Ливия ва Тунисдан минглаб фуқаролар яхши ҳаёт илинжида Европа жанубига ноқонуний тарзда сузиб ўтади. Денгиз тўлқинлари ва табиий офатлар оқибатида уларнинг кўпчилиги денгизда чўкиб ҳалок бўлади.
Бирлашган Миллатлар Ташкилоти 2014 йилдан буён Ўрта Ер денгизининг марказий қисмида 20 000 дан ортиқ муҳожирлар ўлими қайд этилганини маълум қилган. Яна бир неча ўн минглаб муҳожирлар бедарак йўқолган.
Халқаро Миграция ташкилоти жорий йилнинг май ойида Ливияда 706 мингдан ортиқ муҳожир бўлганини хабар қилган. Улар турли чегарадош мамлакатлардан кириб келган ва Европага ўтиб кетишни режалаштирган. Бироқ Ливия соҳил қўриқлаш хизмати фаолияти кучайиши туфайли мамлакатни тарк эта олмаган.
Изоҳ (0)