Ўрта Ер денгизининг Ливия қирғоқлари яқинида 7 июнь куни 160 нафардан ортиқ муҳожир қутқариб қолинди. Бу ҳақда “Чегара билмас шифокорлар” ташкилоти тарқатган хабарга асосланиб, Reuters маълумот берди.
Манбада айтилишича, Гео Barents қидирув-қутқарув кемаси муҳожирларни қутқариш учун иккита махсус операция ташил этган. Бунинг оқибатида дастлаб 146 нафар, кейин эса яна 20 нафар муҳожир қутқариб олинган.
“Spotтер” денгиз кузатув самолёти денгизда 11 та жасад сузиб юрганини маълум қилган. Улар махсус қайиқлар юбориб сувдан чиқариб олинган.
“Биз бу фожианинг аниқ сабабини билмаймиз, лекин одамлар хавфсизликка эришиш учун умидсиз уриниш ортидан эргашиб, ўлишда давом этаётганидан хабардормиз. Бу фожиалар тугаши керак”, — дейилган “Чегара билмас шифокорлар” ташкилоти баёнотида.
Денгизда жасадларни илк бор пайқаган Sea Watch гуруҳи марҳумларни олиб кетиш учун Ливия қирғоқ қўриқлаш хизмати билан боғланишга ҳаракат қилганлигини маълум қилган. Аммо Ливия денгиз хизмати уларнинг чақирувини жавобсиз қолдирган.
Бирлашган Миллатлар Ташкилоти 2014 йилдан бери Ўрта Ер денгизининг марказий қисмида 20 000 дан ортиқ муҳожир бедарак йўқолганини қайд этган. Ҳозирда денгиз Шимолий Африкадан Европага ўтувчи муҳожирлар учун дунёдаги энг хавфли нуқтага айланган.
Хабарда айтилишича, қутқарилган 160 дан ортиқ муҳожир Гео Barents кемаси билан шимолий Генуя портига олиб кетилган. Улар кейинчалик Сицилияга юборилиши хабар қилинган.
Изоҳ (0)