Shimoliy Afrikadagi Liviya va Tunis hukumatlari migratsiya inqiroziga qarshi kurashda Yevropa rahbariyatidan yordam so‘radi. Bu haqda Al Jazeera nashri xabar berdi.
Manbada aytilishicha, Tunis va Liviya hukumatlari qochqinlar va muhojirlar oqimini to‘xtatish bo‘yicha xalqaro Tripoli konferensiyasida qatnashgan. Unda O‘rta Yer dengizi janubidagi muammoli vaziyatni bartaraf etishda amaliy qadamlar tashlash so‘ralgan.
Tripoli konferensiyasida Afrika va Yevropaning 28 davlati vakillari qatnashgan. Unda hukumatlar vakillari tartibsiz migratsiyani bartaraf etish borasida reja ishlab chiqishga kelishib olishgan.
Har yili Shimoliy Afrikadan, asosan, Liviya va Tunisdan minglab fuqarolar yaxshi hayot ilinjida Yevropa janubiga noqonuniy tarzda suzib o‘tadi. Dengiz to‘lqinlari va tabiiy ofatlar oqibatida ularning ko‘pchiligi dengizda cho‘kib halok bo‘ladi.
Birlashgan Millatlar Tashkiloti 2014-yildan buyon O‘rta Yer dengizining markaziy qismida 20 000 dan ortiq muhojirlar o‘limi qayd etilganini maʼlum qilgan. Yana bir necha o‘n minglab muhojirlar bedarak yo‘qolgan.
Xalqaro Migratsiya tashkiloti joriy yilning may oyida Liviyada 706 mingdan ortiq muhojir bo‘lganini xabar qilgan. Ular turli chegaradosh mamlakatlardan kirib kelgan va Yevropaga o‘tib ketishni rejalashtirgan. Biroq Liviya sohil qo‘riqlash xizmati faoliyati kuchayishi tufayli mamlakatni tark eta olmagan.
Izoh (0)