Бошқа давлатлар Хитойнинг ўз суверенитетини ҳимоя қилиш қатъиятини паст баҳоламаслиги, Тайван масаласи бўйича кимдир чегарани кесиб ўтиши ва бунинг бадалини тўламаслиги мумкин деган хаёлга бормаслиги керак. Бу ҳақда Хитой ТИВ матбуот котиби Лин Жиан маълум қилди.
Хитой аввалроқ АҚШнинг олтита ҳарбий-саноат корхонасига ҳамда ушбу компанияларнинг бешта топ-менежерларига Тайванга қурол сотгани учун санкциялар киритган эди.
АҚШнинг Тайванга қурол сотиши “ягона Хитой” тамойилини ва учта қўшма Хитой—АҚШ коммюникелари қоидаларини жиддий равишда бузади. Бу Хитойнинг ички ишларига қўпол аралашув ҳисобланиб, мамлакат суверенитети ҳамда ҳудудий яхлитлигига жиддий зарар етказади, дейди Лин Жиан киритилган санкцияларни шарҳлар экан.
Унинг таъкидлашича, Тайван масаласи Хитой—Америка муносабатларидаги биринчи “қизил чизиқ” бўлиб, уни кесиб ўтиб бўлмайди.
Ҳеч бир давлат, ташкилот ёки шахс ХХР ҳукумати ва халқининг миллий суверенитет ҳамда ҳудудий яхлитликни ҳимоя қилиш борасидаги қатъияти ва улкан имкониятларини эътибордан четда қолдирмаслиги керак. Ҳеч ким Тайван масаласида чегарани бузиб, бунинг учун товон тўламайман, деган хаёлда бўлмасин, дея қўшимча қилган хитойлик дипломат.
Тайван атрофидаги вазият 2022 йил августида АҚШ Конгресси Вакиллар палатасининг ўша пайтдаги спикери Ненси Пелоси оролга ташриф буюрганидан кейин сезиларли даражада ёмонлашган эди. Хитой Пелосининг ташрифини АҚШнинг Тайван сепаратизмини қўллаб-қувватлаши сифатида қоралаган ва кенг кўламли ҳарбий машғулотлар ўтказган.
Изоҳ (0)