Греция Украинага 32 та F-16 қирувчи самолётларини топширади — Newsbreak

Греция Украинага 32 та F-16 қирувчи самолётларини етказиб беради, деб хабар бермоқда Грециянинг Newsbreak нашри.

Нашр, шунингдек, Греция Франциянинг Mirage 2000-5 Мk 2 қирувчи самолётларини Украинага топширишини тасдиқлади.

Греция мудофаа вазири Никос Дендиаснинг таъкидлашича, ташаббус доирасида Греция ҳаво кучлари 2030 йилгача 4,5 ва 5-авлод қирувчиларига эга бўлиши керак, улар аста-секин 3- ва 4-авлод қирувчиларини алмаштириши зарур. 

Нашр таъкидлаганидек, 32 та F-16 қирувчи самолётлари Украинага топширилишига “деярли шубҳа йўқ”. Newsbreak маълумотларига кўра, ушбу самолётлар хизмат кўрсатиш даврида иккита янгиланишдан ўтган.

Бундан ташқари, Греция 24 та Mirage 2000-5 Мk 2 қирувчиларини ҳисобдан чиқаришни режалаштирмоқда, улардан 14 таси янги, қолганлари модернизация қилинган. Нашрнинг таъкидлашича, Греция учун “мантиқий вариант” — бу самолётларни Украинага топшириш ёки Ҳиндистонга сотишдир. Бунинг учун Афина Франциянинг розилигини олиши керак.

10 январь куни Грециянинг Olympia нашри АҚШ давлат котиби Энтони Блинкен Греция бош вазири Кирякос Мицотакис билан учрашувда Украинага ҳарбий ёрдам етказиш бўйича ультиматум қўйгани ҳақида хабар берди. Нашрнинг тахминича, гап Киевга S-300 ҳаво мудофаа тизими ва F-16 қирувчи самолётларини топшириш ҳақида кетаётган бўлиши мумкин.