Ўзбекистонда 2024 йилнинг биринчи ярмида 550 млрд сўмдан ортиқ электр энергияси ва табиий газдан ноқонуний фойдаланилгани аниқланди. Бу ҳақда “Ўзэнергоинспекция” матбуот хизмати раҳбари Наврўз Норбобоев маълум қилди.
Қайд этилишича, назорат тадбирларида 4 537 та истеъмолчи томонидан табиий газ ва электр энергиясидан ноқонуний ва қоидабузарлик ҳолатлари аниқланди. 163,3 миллион метр куб табиий газ ва 220,7 миллион киловатт-соат электр энергиясидан ноқонуний фойдаланилиши натижасида давлат манфаатларига жами 550 миллиард 290 миллион сўм зарар етказилган.
Хусусан, 89 та АГТКШ, 94 та иссиқхона, 94 та текстиль корхона ва 2 та оҳак ишлаб чиқариш цехлари фаолиятида ноқонуний ва қоидабузарлик ҳолатлари аниқланди.
Шунингдек, крипто-актив ва майнинг фаолияти бўйича электр энергиясидан ноқонуний фойдаланган истеъмолчиларни аниқлаш юзасидан ўтказилган назорат тадбирларида 75 та ҳолат аниқланди. Ушбу аниқланган ҳолатлар юзасидан электр таъминоти корхонаси томонидан жами 81 миллиард 604 миллион сўм (15 миллион 909 минг киловатт-соат) миқдори қайта ҳисоб-китоб қилинди.
Истеъмолчилар томонидан энергия ресурсларидан фойдаланиш қоидаларини бузиш билан боғлиқ ҳуқуқбузарликлар бўйича 3382 та маъмурий иш расмийлаштирилди.
Ўтказилган назорат табирларида аниқланган ҳолатларнинг 1904 таси электр энергияси, 1478 таси эса табиий газдан фойдаланишда қоидабузарликка йўл қўйилгани маълум бўлди.
Инспекциянинг назорат-кимё лабораториялари томонидан нефть маҳсулотлари бўйича олиб борилган сифат назорати тадбирлари давомида АЁҚШ ва корхоналардан олинган таҳлил наъмуналаридан 91 та ҳолатда 3 миллион 789 минг литр нефть маҳсулоти сифатсизлиги аниқланиб, сотувга чиқарилиши олди олинди.
Изоҳ (0)